Авва Дорофей - Аскетика. Том I
620. Брат погреши, и слышав от аввы, многажды: точию рцы: прости, ожесточився не рече. И сотворив авва молитву со треми коленопреклонении, егда новину его рещи, прости. Отходящу же брату в келлию свою, рече ему авва: брате, испытай сердце твое в келлии твоей о себе, и обрящеши, откуду тебе приключися жестокость сия сердца твоего. И якоже сие сотворил есть брат он, прииде припадая, и исповедаяся авве, и молил есть: да возвестит великому старцу Варсануфию вещь сию, и попросит его сотворити молитву о нем.
Ответ Варсануфия. Брате, внемли себя. Ты взыскал еси посеяну быти селу твоему от мене. Никтоже тя убедил есть. Виждь, да не оставиши постоянным быти во пшенице твоей от диавола плевелом, снеди, глаголю, огня. Аз ти глаголю. Ты вопросил мя еси о помыслех твоих. Отцы глаголют: аще вопрошает кто, то до смерти должен есть сохранити. И аще кто не хранит, в погибель будет. Злы и люты имаши крыющияся в сердце твоем помыслы. Что помышляеши смертоносны помыслы, яже не суть? Но диавол есть творяй тебе свет тму и тму свет, и горькая сладка ти показуя, и сладкая горька (Исх. 5, 20). Живот он видиши быти смерть, и смерть ону живот. Обходит бо рыкая враг, хотя тебе поглотити жива (1 Пет. 5, 8), и не разумеваеши, зане аще не бы рука Божия, и молитва святых покрывала тя, то в погибель и прелесть его имел бы еси впасти. И отмещеши Божественная словеса, глаголемая ти от аввы твоего, на пользу и спасение души твоея: яко да никогда же приидеши в познание живота. И яковы труды творит о тебе, якоже о своей его души, моля святыя о томжде помолитися о тебе, яко да избавишися от сетей диаволих и смерти, и спасешися во гнездо Господне. И тако трудится о тебе, и неси ли должен сохранити словеса его, яко зеницу ока, и имети его паче души твоея? Но изобилен был еси, насытився от сопребывания его всегдашняго, егоже не должно было тебе, имети насыщение, но помолитися ти подобаше сподобитися того: и да не будет ти во осуждение, еже быти с ним всегда, и творити заповедаемое от него со тщанием, и великим страхом и трепетом, яко да приидет на тя чрез него благословение от Бога, и избавишися от прелести вражия. Да не сбудется о тебе: яко «яде Иаков, и насытися, и отвержеся возлюбленный» (Втор. 32, 15). И сбудется на тебе: «горе тебе Хоразине, горе тебе Вифсаидо, яко аще в Тире и Сидоне быша силы, бывшия в тебе, древле убо во вретищи и пепле покаялися быша» (Мф. 11, 21). И да не услышиши и ты: «возненавидел еси наказание, и отвергл еси словеса моя вспять» (Пс. 49, 17). Что множицею искушаеши себе, от себе подвизая словеса к некиим, и не терпиши что-либо глаголют, но от зависти и оглаголания ослепевает сердце твое и приносит тебе смущение? И множицею преткнулся еси, и сокрушил еси лице твое, и не срамляется медяное чело твое? И не преклоняется железная выя, якоже и от брата Иоанна речено бысть тебе? Кто же употребил есть сия, и спасеся? Каин от начала употребил есть, и прият клятву от руки Господни, и по нем исполнини, и утонуша в водах потопа: Хам, и Исав, и отвержени быша от святых благословений. Фараон ожесточися, и пожре его вода Чермнаго моря в потопление, и сущих с ним. Иже с Дафаном сопротивишася Моисеови, и пожре их земля и домы их. И аще священника сопротивльшася пожирает земля по Писанию, како ты посмел еси сопротивитися глаголющему ти рещи: прости, и не глаголал еси? И отчуждил еси себе от смирения Божия и от словес отец, глаголющих: во всякой вещи требуем смирения, еже рещи во всяком деле и слове, прости. И слышал еси множицею, и не рекл еси. Но и еже рекл еси послежде, не бе истина, понуждение бо, а не с покаянием и умилением рекл еси. Доколь жестоковыен еси, и необрезан сердцем? Виждь, яко никтоже жесток есть. Почто даеши руку и силу диаволу, на погибель души твоея? Прочее трезвися, брате мой, бодрствуй, возбудися от тяжчайшаго сна, и обдержащаго тя пиянства без вина. Где смирение? Где послушание? Где еже отсещи волю во всех? Аще бо во едином отсецаеши волю твою, а во едином не отсецаеши, то явно есть, яко и в немже отсекл еси, паки ину волю имел еси. Во всех бо повинуется повинующийся. И таковый не печется о спасении своем, яко иному о нем ответствующу: емуже повинуся, и вверил есть себе. Аще хощеши убо спастися и жив быти на небеси и на земли, сохрани сия, и даю слово о тебе брате. Аще ли же нерадиши, ты узриши. Упования да не отсечеши: сия бо радость есть диаволя. Авву сотворих прияти тя в недро свое, якоже и бысть. Отерпеваше бо о непокорении твоем, и не послушании твоем. И увещах его прияти тя со страхом Божиим, яко сына родна, а не яко прелюбодейчища. И ты во страсе Божии ввери себе тому во всех. И свидетель ми есть Отец, и Сын, и Святый Дух, яко ношу всяко попечение твое пред Ним. И от мене взыщет кровь твою, аще не упраздниши словеса мои. От днешняго убо дне положи начало, помогаемь рукою Божиею. Се юноша был еси, сохрани себе, и да не вонмеши буесловиям неполезным. Господь да даст ти разум и силу еже услышати, и сотворити. И аще что хощеши вопрошати от времене, не обленюся отвещати тебе, еже даст Бог во уста моя, извещавая сердце твое, что рещи тебе ко спасению души твоея, о Христе Иисусе, аминь.
621. Тойжде брат, еще преслушав авву, и вопросив великаго старца: полезно ли есть сохранити кому с клятвою глаголемая во время ярости его, или покаятися, и яже клятвы не содеяти? Отвеща ему старец сия:
Рече Господь к Моисею: «сниди скоро, беззаконноваша бо людие, ихже извел еси из земли Египетския: уклонишася бо с пути, егоже заповедал еси им: и се сотвориша тельца, и поклоняются» идолу тому (Втор. 32, 7, 8). Како, окаянне, прельщен был еси вскоре от послушания, от негоже отчуждити тя диавол хощет, и неистовится на тя? Не сие ли есть, еже рекох тебе, яко безумен еси, и необрезан сердцем? Где повергл еси словеса моя? Почто тщишися власти в яму диаволю? Почто ослепляет тя враг о тех, яже слышал еси? Не заповедано ли бысть тебе предати себе в руце Божии и в руце аввы твоего? Не слышал ли еси, яко хощет спасения души твоея, якоже пользы души своея? И не должно бе тебе преслушати его, аще бы (повеленное им столь тяжко возмнилося тебе, аки бы) рекл тебе и убийство сотворити, за пользу наипаче братии, юже чрез оправдание погубляет от тебе сатана: да ниже ты пользу приимеши, ниже ин тобою. И хощеши прияти горе фарисеев, и стража Иезекиилева о грядущем мечи (Иез. 33, 6). Да будет ти, яко не можеши воспользовати кого, то почто не глаголеши могущему? Что сотворился еси скоро, яко пес, возвращся на свою блевотину, и яко свиния в кал тинный (2 Пет. 2, 22), пребывая непреклонен в жестокосердии твоем? Заповеда тебе вся рещи бывающая, и грех его бы был: и раздражаеши его, яко людие Моисея. Усрамися прочее, отложи твой древний обычай, и обратись, и приимет тя Бог, милостив бо есть. И да не вонмеши человекоугодиям, понеже погибаеши, и не бываеши раб Божий. Внемли себе, окаянне, и убойся Бога. Во гневе же ярости твоея несть полезно тебе сохранити со клятвою реченная и преступити заповедь Бога глаголющаго: не убиеши (Мф. 5, 21). Лучше бо есть покаятися ко Богу, о глаголанном с клятвою еже сотворити, и не сотворити того, и не впасти во осуждение Ирода, иже, за еже поставити нечестивую свою клятву, усече главу Иоанна Предтечи и отпаде от вечныя жизни: и предан бысть горцей и безконечной муце. Но паче полезно есть покаятися и просити у Бога прощения, подати сие могущаго. Зане блажен бы был и Ирод, аще бы сие сотворил: не сотворив же, бысть треокаянен, и проклят во век. Но и Петр, верховный апостолов, клятся три краты и отвержеся, яко не знает Спасителя, но раскаявся с горчайшим плачем и истинным покаянием, разрешил есть грех свой: и прият бысть от человеколюбиваго Владыки Христа и Спаса, и не точию радости сподобися, Ангелу рекшу женам: рцыте учеником Его, и Петрови (Мк. 16, 7): но и Сам Господь, вместо триех отвержений, трижды вопроси его, глаголя: Любиши ли мя (Ин. 21, 17), Петре, показуя ему, яко добрым покаянием исцелися его оный триех отвержений грех. Не ктому убо да кленешися, преступая заповедь Божию. Аще ли же в сем согрешиши, то да не вознегодуеши покаятися. Ибо и Петр аще бы поставил клятву свою не знати своего Владыки, то чужд бы Его имел быти и славы Его.
622. Брат извещение прием о сих, вопроси тогожде великаго старца тако: рече боголюбие твое, яко может грешный грехи своя покаянием разрешити. Что убо? Еда не требует и молитвы святых, но довлеет собою самем? Аще ли же и не покажет истиннаго покаяния сам, святии же помолятся о нем, не разрешаются ли тех ради греси его?
Ответ. Аще и человек не сотворит еже по силе и не примешает того к молитве святых, ничимже пользуется молящимся святым о нем. Аще воздерживаются ни за него, и молятся о нем, той же сластолюбствует и безчинствует, что пользует моление их еже о нем? Сбывается бо зде реченное: един созидаяй, а другий разоряяй, что множае успеют, токмо труды (Сир. 34, 23)? Зане, аще бы возможно было сему быти, да тай, о немже бы молилися святии, не внимая себе поне мало что, спасался бы, то не было бы препятствия, да и о всех грешных мира сего сие творят. Но аще мало что потрудится и грешный, требует и молитвы праведнаго. Глаголет бо апостол: много может молитва праведнаго поспешествуема (Иак. 5, 16), то есть: да, егда молится зань святый и праведный содействует и грешный по силе своей, покаянием молению святых, не доволен сый сам един ко отданию долгов. Зане той убо мала совносит, моления же святых многая. Якоже бо, аще кто имать нужду понести десять спуд пшеницы, и ниже два может, обрящет же человека боящася Бога, и той понесет от нея девять спуд оныя и оставит ему един, то соблюдает его, да спасется, а не на пути от разбойник убиен будет: тако и зде. Паки подобен есть грешный человеку должну сушу сто златиц, иже напомянен быв от заимодавца о отдании долга, пойде ко иному человеку благочестиву и богату и моли его дати ему по любви, якоже может; он же, человеколюбив сый и видя скорбь его, милосердовав рече ему: брате, что-либо имам в руку моею, даю за тя, и свободишися от рукописания. В должнице убо есть потщатися малая дати, и многих свободитися. Аще бо не увидит он милосердый человек, яко принесе он десять златиц, не хощет той девять, десять дати: ведый, яко заимодавец не даст рукописания, аще не исполнятся должныя сто.
