Авва Дорофей - Аскетика. Том I
Ответ. Брате, в долзе сый человек, аще не прежде отдаст долга, идеже аще отыдет, или во град, или в весь, и идеже аще сядет, должник есть, и не имать свободы, где сести с покоем. Егда же утрудится прежде от поношений человеческих, стыдится, тогда откуду-либо отдаст долг, и егда свободится, тогда со смелостию и многим дерзновением может посреде народа ходити, или седети, идеже хощет. Такожде и человек, аще убо сотворит по силе своей, еже понести досаждения, и поношения, безчестия же и тщеты, содеянных ради им согрешений, смирению навыкает и труду, и прощаются ему сих ради согрешения его, по писанному: «виждь смирение мое, и труд мой, и остави вся грехи моя» (Пс. 24, 18). Помысли же, яко прежде креста, колика досаждения и поношения претерпе Владыка наш, Иисус Христос, и по сих прииде на крест. Сице не может кто приити в безмолвие совершенное и плодовитое, и во упокоение святое совершенства, аще не прежде спостраждет Христу и претерпит вся страдания Его, поминая апостола, глаголющаго: «яко аще страждем с Ним, и прославимся с Ним» (Рим. 8, 17). Да не прелстишися убо: инаго бо пути спасения несть, кроме сего. Господь да поможет ти по воле Своей, да, якоже глаголет во Евангелии, добре положиши основание своему зданию на твердом камени, Иже есть Христос.
343. Прошение к великому старцу. Брат моли великаго старца, глаголя: помолися о мне, да помилует мя Бог, яко страстен есть.
Ответ Варсануфия. Иже хощет помилован быти, да сохранит заповедь, еже не снести от древа, и не падет в преслушание: а не падаяй в преслушание, милуемь бывает, и спасается благодатию Христа, Бога нашего. Зане таковый помыслу глаголет: аз и Бог едини есмы в мире. И аще не сотворю Его воли, не Егов обрящуся, но чуждаго, и чает исхода своего от телесе на всяк день, и како имать усрести Бога, и скоро одерживает путь спасения.
344. Прошение к томужде. Брат, впад во искушение, и просив молитвы от самаго великаго старца, и облегчение приемь, возвести, благодаря ему, купно же прося и о случившемся главоболении, и о еже просветитися сердцу его.
Ответ Варсануфия. Брате, внимаем себе со страхом Божиим, и аще благоутробный Бог по человеколюбию Своему облегчит брань от нас, то ниже тако да вознерадим: мнози бо приемше облегчение вознерадиша о себе, и падоша стремглав. Но облегчившеся благодарите Богу, откуду нас избави, и пребудем в молитве, еже не впасти в таяжде страсти, ниже в другая. Аще бо снесть кто снедно, и повредится стомахом (желудком) своим, или селезенкою, или печению, и прилежанием и художеством врача исцелеет, ктому не нерадит о себе, да не в горшая приидет, поминая бедствие оно; якоже и Господь рече исцелевшему от Него: «Се здрав еси, ктому не согрешай, да не горше ти что будет» (Ин. 5, 14). Брате добрии воини, и во время мира присно поучаются художеству брани. Не попутается бо воин поучатися во время брани удобно в тех, яже суть брани. Писано бо есть: «уготовихся, и не смутихся» (Пс. 118, 60) отнюд убо да не восприимеши дерзновения, с нимже искус приял еси страсти, ниже со иным ким. Отцы бо глаголаху о дерзновении, яко погубляет плоды инока. Не может убо человек без попечения быти о брани, даже до последняго издыхания, да не приидет низу уловлен от пронырливаго врага, его же да упразднить Господь от нас духом уст Своих. Поминай, яко рече старец: аще сотворит человек небо ново, и землю нову не может быти без попечения. О главоболении же понудитися должен есть кто еже не ослабити себе, и приимет помощь. Обрет бо Господь Своя ученики расслабленны, рече им: «Бдите и молитеся, да не внидете в напасть» (Мк. 14, 38). Чадо, Просветивый очеса слепаго, да просветит очи сердца твоего, еже разумети благое и полезное, и Бог сил да укрепит тя и утвердит тя совершенною верою, рекий: «вся возможна верующему» (Мф. 9, 23). И да увижду тя в лице спасаемых, благодатию Предстателя душ наших, Иисуса Христа, Ему же слава вовеки. Аминь.
345. Брат мирский тогожде великаго старца, стар сый и той, посла прося его видетися с ним. Старец же сказа ему сия: аз брата Иисуса имею. Аще же, презрев мир, будеши инок, тогда брат мой еси. Сия слышав, со многим плачем отыде, и по некоем времени пришед, отвержеся мира тамо, и в болезнь телесную воднаго труда впад, посла прося старца помолится о болезни его.
Он же отвеща сия: болезнь сия не бы пришла ти, но да отыдеши безплоден к Богу. Аще убо претерпиши, и благодариши, вместо постничества вменится тебе, яко непремедлил еси во образе иночестем. И отчасти же скорбь сия прилучися ти, яко вменил еси мя, ничтоже суща и себе: мене убо, аки велика, — себе же, аки брата таковаго человека, и не веси, яко чада есмы преступления Адамля, и земля есмы и пепел. Благодари убо Бога, приведшаго тя в таковое состояние. Аще же быхом имели смирение Иисуса
Христа, могли быхом рещи: «Кто есть мати моя, и кто суть братия моя?» (Мф. 12, 48) и прочая.
346. Брат, слышав от некоего брата о брани, советова ему, елико возможе, яже на пользу, не достиг в сию меру. И абие прииде брань на него. И яко виде себе отягчаема, и позна, яко сие найде, от еже не исповести братови своея немощи, и яко отцев подобает паче вопрошати, возвести вещь сию иному старцу.
Ответ Иоанна. Брате, несть инаго пути, точию да порицает себе человек, за яже глагола, и простит ему Бог. И абие облегчися от брани брат той, и благодари Бога.
Вопрос 347, тогожде. Аще предлежат две вещи притщетны душе, и нужда всячески в едину от них впасти, что подобает творити?
Ответ Иоанна. В разсуждении двоих вредов подобает менший избрати. Пишет бо во отцех: яко прииде некто просити пенязя от некоего, и не даде ему, рек, яко не имею дати тебе. И вопрошен быв по сему, чесо ради не даде ему, рече: яко, аще бых дал, вред бы был душевный: и избрах преступити едину заповедь, и не совершенне душу погубити.
Вопрос 348, к великому старцу. Брат добродетелию по Богу преуспевая яви великому старцу, глаголя: рцы ми, авво, слово, яко скорблю.
Ответ Варсануфия. Святый апостол Павел, уразумев силу, писаше глаголя: Терпения бо имате потребу, да волю Божию сотворше, приимете обетования. Хотяй убо совзыти на крест со Христом, должен сопричастник быти страстем Его, и присно имети будет мир. И аз ти глаголю: подвизайся благодарение стяжати во всех, и сила Вышняго осенит тя. И тогда обрещеши покой.
Вопрос 349. Что сотворю тимению, еже имам, и оправданию, яко оскорбляют мя люте?
Ответ Варсануфия. Имеяй тимение на себе, удобно отрясает е, егда хощет. Углебший же в тимении, трудом многим исторгает себе от него. Горше же есть углебнути, нежели имети е. О оправдании же — злоба николиже убивает злобу. Поминай убо, яко оправдание не оправдает человека, и почиеши. О забвении же — два забвения суть: и едино другому противится. Доспевый убо забыти снести хлеб свой, от гласа воздыхания своего, не побеждается от забвения вражия.
350. Прошение тогожде. Приложи милость и исторгни мя от чрева львова, яко поглотил мя есть, и ущедри душу мою якоже Бог прежде. Вам бо дана есть власть: яко, «еже аще разрешите на земли, будет разрешена на небесех» (Мф. 18, 18). И не остави души моея в геенне, да не умрет во гресе. И рцы ми слово по силе, да общник буду труда твоего.
Ответ Варсануфия. Сам Бог мира да освятит вас всесовершенных во всем: и всесовершен ваш дух и душа и тело непорочно в пришествие Господне да сохранится. Утешительнейшо слова сего апостольскаго что имел бых тебе послати? Яже написана ти суть от мене, потщися стяжати. Ибо аз вещше тебе труждаюся, моля Бога нощь и день, дондеже достигнеши в сия. Сие же уразумей, брате, яко душу мою, якоже веси, сладце полагаю за тя, и моление мое о тебе непрестанно есть.
Вопрос 351, другаго. Брат посылаемь на дело общежития, вопроси инаго старца: должен ли есть, призываемь от возлюбленных, ясти с женами? И отвеща старец: не ясти с ними отнюд. И рече брат: и откуду увем, егда зване некиим буду, еда хощет приити жена ясти с нами, да не пойду?
И рече старец: вопроси призывающаго тя, аще есть тамо жена. И аще речет, яко есть; отрецыся глаголя: прости мя, яко заповедь имам не ясти с женою. И рече брат: аще прилучится ми поити, и вниду прежде даже вопросити, и восхощет той, да приидет жена на трапезу, что должен есмь сотворити? И рече старец: должен еси пояти особь звавшаго тя, и рещи ему: прости мя, яко забых рещи тебе, яко заповедь имам не ясти с женою, но отпусти мя, и отыду. И аще убо отпустит жену оттуду, пребуди. Аще ли же ни, отыди, и не преслушай заповеди: да не будет ти смерть от преслушания. И да не убоишися: не будет бо ти в соблазн, но в назидание.
Вопрос 352, тогожде. Аще послан буду к некоему на дело, не имея дозволения о пищи, и понудит мя ясти абие у него: и аще, мне рекшу ему: яко не могу, не имея повеления от аввы, пребудет любопряся, и принуждая мя, что сотворю?
Ответ Иоанна. Понеже любопрение ничто же раждает благо, то аще не предлежит вред душевный, восприими, и пришед возвести авве, прося прощения, яко согрешив. Аще ли имать вред, аще и тмами любопретися имать, не послушай. Сие бо проявленно дело есть диаволе.
