Авва Дорофей - Аскетика. Том I
Вопрос 325, тогожде. Понеже иногда ми рекл еси, яко в сем отсецает кто свою волю, во еже не любопретися составити свой разум, — что убо, отче, яко приношу вещь больному, аки полезну, и многажды вредит его, и скорблю, яко волию в сем составив; паки, вижду, яко весь день в попечении есмь, и аки не допущаемь ни Бога помянути и паки стужение приемлю от чревобесия. Рцы убо ми, что сотворю? Верую бо, яко отсюду ми есть спасение.
Ответ Варсануфия. Аще непщуя, яко вещь сия на пользу есть немощным, составиши разум свой, и прилучится от нея вред тем: Бог, смотряяй сердце твое, не осудит тя. Весть бо, яко хотя пользовати, вредил еси. Аще ли же искусен некий речет ти, и не брежеши послушати его, гордость есть и воля. Мнози слышат присно о граде, и случается им внити в онь не ведущим яко той есть. Брате, весь день в памяти еси Божией, и не веси? Еже бо имети заповедь, и тщатися сохранити ю, и повиновение есть, и память Божия. И добре рече ти брат Иоанн: изнеси прежде листвие, и повелением Божиим изнесеши и плоды. Не ведый убо полезнаго, последуй ведущим: и се есть смирение, и обрящеши благодать Божию. И яко же рекл еси, яко отсюду ми спасение, добре рекл еси сие. Не бе бо без Бога пришествие твое, но Бог путеводствова тя. Возмогай о Господе. Велие бо приобретение имаши от попечения, еже глаголеши. И противу чревобесия подвизайся, елико возможно. И поможет ти Господь разумети и творити полезное тебе. Мужайся и крепися о Господе.
Вопрос 326, тогожде. Понеже рекл еси ми, яко, еже имети заповедь и упражнятися в ней, и повиновение есть, и память Божия, молю и сему научити: возможно ли есть в таковом попечении бываемаго по Бозе служения, и посреде человек, имети сию память Божию неоскудну? И аще возможно есть, испроси ми, отче, аще что на пользу ми есть. Вся бо тебе и Богу возможна суть.
Ответ Варсануфия. О непрестанной памяти: по своей мере кийждо может. Ты точию смирися. Аз бо вещше о тебе вем, что на пользу ти есть, и сего прошу тебе у Бога. Яко Тому вся возможна.
Вопрос 327, тогожде. Паки припадаю ти, отче милосерде, и не престану стужати, дондеже укрепиши мя. Егда бо молитвами вашими даст ми Бог малую печаль о согрешениих моих, аз по малу внешним парением погубляю ту. Молю убо тя, отче, и сие самое утверди ми, да будет вся милость Божия и ваша, и не от мене что-либо. Ничесоже бо могу отнюд, аще не укреплюся молитвами вашими. И о правлении больницы боюся, отче, зане аки власть есть, еда како содействует ми к тщеславию и дерзновению. И еже употребляти часто вещества снедей, в чревобесие следует уклонитися. Аще убо разсуждаете да подлейшим званием предобучу себе, и аще облегчуся мало, паки вступлю в службу сию. Веси, отче, не уныв от дела, сия глаголю. Что бо творю окаянный? Но боюся, отче, да не како сежу раздражая страсти моя сия, от себе ли или от бесов непщую, не вем. Ты же, отче, волю Божию яви ми, и от смущающих мя помыслов изведи, и укрепи мя молитвами твоими сотворити, еже глаголеши, и прости мя.
Ответ Варсануфия. Слыши, брате, и уверен буди о Господе, яко егда поручихом ти приити на дело сие, рука наша и сердце с тобою есть, паче же рука Бога, умоляемаго от нас молитвами о спасении души твоей, и о укреплении, еже в деле, и о успеянии и покрове еже в нем. Несть ти инако спастися, разве тако. Прочее, да не уныеши падая, и востая, поползаяся, укоряя себе, дондеже сотворит Господь с тобою милость, ея же хощеши, точию да не вознерадиши. Дерзай же, яко поставивый тя Господь на дело сие, Той устроит. И мы носим с тобою попечение. Да не убо оправдании прелстит тя диавол. Глаголет бо: благими словесы и благословением прелщают сердца незлобивых. Поставивый тя в дело сие, Той есть вся; «Рекий учеником Своим: Аз посылаю вас» (Мф. 10, 16). И паки: «се Аз с вами есмь» (Мф. 28, 20). Не бойся, и ни мало размышляй от себе о больнице, унывая от попечения власти. Аще бо уразумееши написанная тебе, вещи не имаши. Точию внимати себе должен еси по силе своей, и Бог споспешит ти. Здравствуй о Господе, возмогаемь о Нем.
Вопрос 328, тогожде ко иному старцу. Аще что согрешает сущая со мною братия, како без смущения исправлю их?
Ответ Иоанна. Аще прообразиши хотение Божие в сердце твоем, не смущаешися, но обычай добр твориши, яко же отцы. Аще ли же не смотриши и восхитишися, яко человек, рцы Богу с покаянием, прости мя Владыко и помилуй мя; и рцы сущим с тобою братиям: блюдитеся, братие, яко от сего осуждаемся, и погубляем души наша, и не кричи вельми, но довольно в слух ушию. И, аще искусишися в сих, приходит и еже по Богу устроение.
Вопрос 329, тогожде. Молю тя, отче, рцы ми, каков подобает быти образ исправления? И когда подобает юродствовати, или аки юрода себе творити и презирати бываемую вещь? И аще побеждуся в вещи, должен есмь в ней узу определити.
Ответ Иоанна. Противу человеков твори присно: аще веси, яко разумен есть и приемлет, с научением глаголи ему: брате, аще с нерадением творим дело Божие, погибель есть души. Ныне добре ли бысть сие? Потщися отныне. Аще ли же будет неразумен, рцы ему: веру ми ими, брате, яко наказанию повинен еси, яко сице нерадиши: аще реку авве, добре тя имать наказати. А о еже буия себе творити, противу поползновению твори. Аще малое будет, сотворися буй. Аще же велико, да не сотворишися буй. Да не возложиши узы на себе о побеждении, ниже небрежеши. Егда приидеши в не, моли Бога простити тя, зане нерадение бывает.
Вопрос 330, тогожде. Аще же согрешшу от братии некоему, или самым больным, и, хотя исправити его со смущением реку слово, еда должен есмь сотворити тому метание? Аще же и разгневан отыдет от больницы, что сотворю? Повсемственне же о яковых согрешениих подобает метание творити? Зане гордость и оправдание помрачают ум. Аще же кто и сотворит, тщеславие паки последует.
Ответ Иоанна. Со смущением ничтоже да глаголеши: злое бо добра не раждает. Но долготерпи, дондеже престанет помысл, и тогда речеши с миром. И аще убо повинется, се добро. Аще ли ни, рцы ему, хощеши ли, да реку авве, и, аще что разсудит, сотворим, и тако почиеши. Аще же разгневан отыдет, рцы авве, и запретит ему: не твори же ему метания, зане подаеши ему метание, яко истинно согрешил еси, и множае ратует тя. Пред инеми же человеки, якоже видиши согрешение, сотвори со тщанием. Аще будет велико согрешение, метание сотвори; аще же мало, рцы ему усты с покаянием от сердца: прости мя, брате. Блюдися же от гордости и оправдания: возбраняют бо покаяние. Бывает же и от тщеславия сотворит. Презирая убо три сия, сотвори, идеже подобает со смирением, и страхом Божиим, и разсуждением, и в сих пребуди по силе. И Бог поможет ти молитвами святых.
Вопрос 331, тогожде. Аще во время служения больным приспеет час псалмопения или святыя проскомидии, или иная потреба, и ведят сущии со мною братия дати коемуждо, повелеваеши ли поити, или тяжесть ми есть? Аще же и в келлии хощу седети, егда несть ми потребы в больнице, попущаеши ми сие, отче, или ни?
Ответ Иоанна. Аще братия ведят, несть ти тяжесть, за еже пойти, ниже еже поседети в келлии твоей, точию посещай больных.
Вопрос 332. Аще когда подаю кому по потребе его, и зрю, яко скупость стужает ми, якоже немощи дати, дам ли ему меньше потребы, или точию потщуся не дати меньше потребы? Аще ли же и срама ради, аки от человекоугодия, или тщеславия хощет дати помысл больше. Еда ли за страсть дам без мала, или потребу за заповедь?
Ответ. Аще стужает ти скупость дати потребу ближнему, по мере вещи сотвори. Аще имаши много, даждь мало множае. Аще же мало, потребу даждь со опасством. Аще по тщеславию, или человекоугодию хощеши дати, да не даси множае, но потребу такожде со опасством. Бог да вразумит сердце твое, брате.
Вопрос 333. Аще прилучится ми сосуд, и требую его в больницу, и вижду, яко имам пристрастие к нему: убо не в страсть ли ми будет аще возму его?
Ответ Иоанна. Аще требуеши сосуда, и борет тя помысл нань, рцы помыслу, нужда есть в нем, и чесо ради по похотению? И, аще престанет от тебе страсть, возми его. Аще ли же ни, то аще возможно будет потребе быти инем сосудом, сотвори, и озлоби страсть. Аще ли же невозможно, возми сосуд, укоряя себе, и глаголя: аще бы не потребы ради, не бы имех взяти и. Зане победихся похотением.
Вопрос 334. Некто некогда даровал ми одежду, и аз, аки с радостию, приях, ничтоже пререкая. И испытуя себе, обретох, яко не понужде взях ю, но паче по лихоимству. И глаголет ми помысл мой, возврати ю: что убо повелеваеши, да сотворю?
Ответ Иоанна. Похвалим от души подавшаго, и похулим от души приемшаго, и носим ю со смирением осуждающе себе. И прочее сохранимся от лихоимства.
Вопрос 335, тогожде. Аще убо случится кому хотети подати ми вещь, и нуждаюся в ней; вижду же сердце мое, яко по страсти хотяще тую прияти; что сотворю? Прииму ли нужды ради, или отвергуся пристрастия ради.
