Авва Дорофей - Аскетика. Том I
Ответ. Господь наш Иисус Христос, Сын Благословеннаго и Вышняго Бога, да укрепит и утвердит вас, в приятие Святаго Своего Духа, да благим пришествием Своим научит вас о всех, и да просветит сердца ваша, и наставит вас на истину; и да увижду вас яко финикс процветшии в раи Божии, и да обрящетеся, яко маслина плодовита посреди святых, и яко лоза плодоносная на Божественней ниве, вся истинна. Да сподобит же вас Господь пити от источника премудрости. Елицы бо пиша от него, забыша себе, вси вне бывше ветхаго человека, и от источника премудрости наставишася на ин источник любве, никогдаже падающия, и в сем бывше чине, достигоша непарительныя и не высящияся меры, вси ум бывше, вси око, вси светли, вси совершенни, вси Бози. Потрудишася, возвеличишася, прославишася, просветишася, ожиша, понеже прежде умроша. Веселятся и веселят: веселятся о нераздельней Троице, и веселят вышния Силы. Возжелайте чина их, тецыте путем их; поревнуйте вере их: стяжите смирение их, терпение во всех, да обымете достояние их. Непадательную их любовь удержите, да обрящетеся в неизглаголанных благих, «ихже око не виде, и ухо не слыша, и на сердце человеку не взыдоша, яже уготова Бог любящим Его» (1 Кор. 2, 9). О безмолвии же: ныне обучай себе еще мало, и Бог сотворит милость Свою.
121. Томужде великому старцу, аще попустит ему совершенное безмолвие.
Ответ. Рех любви твоей, возлюбленне брате, о безмолвии, еже пождати несколко: не яко не хотяй приити тебе во устроение таковыя меры, да не будет, но желая и моляся, да дарует ти оное Бог, и множае. Ибо радость моя велия есть, ваше всех успеяние. Дарования же суть духовна от Бога даема во времена своя: и Сам призывает, и помогает, и хранит. Глаголет бо: яко «не хваляй себе, сей искусен есть, но егоже Господь восхваляет» (2 Кор. 10, 18). Аще убо дом свой хощеши наздати, прежде уготовай вещество, и вся потребная: и художнику остается еже приити и создати. Суть же потребная таковаго здания: вера твердая в наздание стен; древяная оконца световидна вводящая свет солнечный, ко еже осветити дом, да никая же тма обрящется в нем. Оконца же древяная суть, оная пять чувств, честным крестом Христовым утвержденная, и вводящая свет мысленнаго Солнца Правды, и не оставляющия вмещати ниединуже тму, врага глаголю и доброненавистна в дому твоем. Прочее хощеши ли покрова, покрывающа дом, да ни во дни солнце не ожжет тебе, ниже луна нощию? Сказуется же покров, любы к Богу, яко николиже падает покрывающи дом, и не оставляющи солнца зайти во гневе нашем, да не обрящем е клеветником в день судный, жгущим нас во огни геенском, ниже луну свидетельствующу, о нощном нашем унынии и лености.
Требуется прочее имети двери в дом оный вводящия, и хранящия внутрь пребывающаго. Егда же реку дверь, разумей ты брате мысленную дверь, Сына Божия глаголющаго: «Аз есмь дверь» (Ин. 10, 9). Аще тако уготовиши дом свой, не имущ что от ненавидимых Им: приидет со Благословенным Отцем, и Духом Святым, и обитель у тебе сотворит, и научит тя, что есть безмолвие, и просветит сердце твое радостию неизглаголанною. Аминь.
122. Прошение молитвы и учения к добродетельному житию.
Ответ. Бог наш Иисус Христос, да просветит сердечная твоя очеса,
сыне вожделенне и возлюбленне, ко еже возсияти в них просвещению Святыя Единоначальныя и Животворящия и поклоняемыя Троицы, ко еже наставивися уразумети святая Его таинства, и радоватися вечно, и изыти из Египта, и пресещи жезлом море, и связати руки лютаго фараона, и торжествовати Богу, жрети же и ясти во святыни пасху, и обогряти уста своя во святей и честней Его крови, препоясану о чреслех, и жезл держащу руками чистыми, и сапоги носящу на нозех непреткновенных, и манною с небесе да напитаешися чрез срабныя тебе облаки: не ктому да обветшает одежда твоя, ниже да возрастет влас главы твоея; да очистится же сердце твое ко приятию Владычняго закона, и да сокрушиши лютаго телца от среды людей твоих, и да пожрет земля враги твоя пререкающия ти, и да пообладаеши царми Амморейскими. И да истребит Бог седмь оныя языки от лица твоего, и да наследиши землю их во век. И да прейдеши Иордан силою Божественнаго чудодейства; и да одержиши град Финикийский, и спасеши Раав блудницу, веровавшую в Бога твоего. И насееши и насадиши, и снеси, и насытишися, и прославиши Бога давшаго тебе. И да не обрящется в тебе Бог ин, зане прочее свят будеши Богу, и не ктому вредят село твое иноплеменницы, яко страшен бываеши им. И да убиеши Голиафа, да с Давидом соцарствуеши, и изыдеши из ветхости новость обрет. И да уверуеши во Христа, да сораспнешися, и умреши купно, и спогребешися с Ним, и совостанеши светло, и совознесешися славно, и сожительствуеши вечно. Умягчи прочее сердце, и обновляется. Елико бо умягчиши е, обрящеши яже в нем помышления в жизнь вечную о Христе Иисусе Господе нашем. Аминь. А о брате иже с тобою, сноси ему по силе твоей. Здравствуяй бо должен есть сносити немощному, дондеже сотворит Бог полезное ему. Радуйтеся о Господе.
123. Прошение тогожде к томужде великому старцу.
Отче святый, благослови мя благословением духовным и освяти ми посланный к тебе куколий и аналав, яко да имам сия покров, о Христе Господе нашем, от всякаго зла.
Ответ. Брате возлюбленне, аще Владыка Христос, Иже вся могий, Господь небесе и земли глагола приступлшему к Нему: «по вере твоей буди тебе» (Мф. 9, 29), аз нищий и убог что имам рещи? Но Бог благословений, да благословит тя всяким благословением духовным, и всякою благодатию правды, и да сотворит тя сопричастника светлости святых, наследника Царствия, свобождаема от страстей нечистых, молитвами и ходатайствы всех святых. Аминь.
О нихже просил еси, егда тако извещаешися, то носити я имам три дни, и послю ти я, егда освятятся беседою к Богу, бываемою чрез молитвы святых, еюже и ты утешаем буди. Помолися и о мне.
124. Тогожде к томужде великому старцу.
Како, отче, увем в келлии своей, аще отсецаю волю свою? Подобне же и сый с человеки? И что есть воля плотская, и воля яже от бесов покрываема благим? И кая есть воля яже по Бозе.
Ответ. Еже отсещи волю в келлии седящу, се есть, еже нерадети о телесном покои по всему. Воля же плотская есть, еже сотворити покой телу в каковой-либо вещи: аще убо не твориши покоя ему, веждь, яко отсецаеши волю свою седя в келлии своей. А еже отсещи волю свою сущу ти с человеки, еже умрети от них есть и быти с ними яко не сущу. Воля же, яже по Богу есть, еже отсещи волю телесную, по апостолу. А яже от бесов воля есть, еже оправдати себе, и веровати себе: и тогда уловляем бывает. Помолися о мне, брате, и прости мя.
121. Тогожде к томужде великому старцу. Каковую подобает повседневно себе уставити пищу?
Ответ. Еже уставити тебе повседневную пищу в келлии, якоже вопросил еси, в попечение ввергает тя и брань. Но якоже благопоспешает Бог, тако пребывай. Иже бо ходит просто, ходит надеяся (Притч. 10, 9).
122. Тогожде вопрос. Добро ли есть во еже поучатися ми: Господи Иисусе Христе Сыне Божий помилуй мя? Или паче изучати от Божественнаго Писания и стихословити псалмы?
Ответ. Обоя достоит творити: мало сице, и мало сице: писано бо есть: «Сия подобаше творити, и онех не оставляти» (Мф. 23, 23).
Вопрос 127, тогожде к томужде великому старцу. Егда пою, должно ли есть на кийждо псалом Отче наш глаголати? Или во время свое Отче наш и прочая в моления истощевати?
Ответ. Еже единою рещи Отче наш и единою моления, едино и тожде есть.
128. Тогожде к томужде великому старцу.
Подобает ли при конце вечерняго и нощнаго славословия и молитвы поминати о мире святых церквей, царя, князей, людей, нищих, вдовиц и елика таковая? И аще той, егоже просят, весть себе страстна, должен ли помолитися?
Ответ. Добро есть поминати в молитве о мире святых церквей, и инех последующих; но яко не достоин, и не имый силы на сие. Апостольское бо есть завещание. И о просящем добро есть помолитися. Есть бо евангельское и апостольское слово: «всякому просящему у тебе дай» (Лк. 6, 30). И еже: «молитеся друг за друга, яко да исцелеете» (Иак. 5, 16), и паки: «якоже хощете да творят вам человецы, и вы творите им такожде» (Лк. 6, 31). И о апостолех моляхуся нецыи. Нерадяй убо о заповеди себе осуждает. Темже убо, могий немогий, понуждаю себе за заповедь.
Ответ 129, тогожде великаго старца к томужде, и к сопребывающей с ним братии: просившей бываемыя от молитвы помощи на враги, и яко да речет им житие иного старца — аввы Иоанна.
Радуйтеся о Господе, чада вожделеннейшая и прелюбезнейшая. Господь да исполнит прошения ваша во многих благих, и да изнеможет в вас лук сильных, и вы да препояшетеся с высоты силою. Удивляюся, аще хощете вы пользы душ ваших, якоже аз хощу, и молю Бога нощию и днию о вашем спасении! Не рех, яко не хощете; но, яко не весте. Отсюду бо известни суть чинове и степени, и меры, и где будет наследие. И якоже человек славен в мире, и искушен в куплях жития сего, и разумеваяй величество, и преимущество, и чести воинския, подвизается увоинити в величии чада своя; они же аки неискусни, небрегут; негли же, не разумевающе честей великих воинов, лучше желают быти художницы рукоделий: тако есмь аз к вам. Но простите мя, якоже бо человек, не в мудрости глаголах. Пришед бо в себе, помянух, яко земля есмь и пепел, всех зол хранилище, прослезихся, о нихже возглаголах, «и рех, вскую похвалися земля и пепел» (Быт. 18, 27). Но обаче зане предварих рещи, яко желаю спасения вашего, и всякаго блага ходатай ваш хощу быти, аще сие возмогу, сотворю по силе моей. О житии же единодушнаго чада, благословеннаго и смиреннаго послушника, по всему отвергшаго даже до смерти хотения своя вся, что имам рещи? Рече Господь: «видевый Мене, виде Отца» (Ин. 14, 9) и о ученице рече: яко может, яко учитель его. Имеяй уши слышати, да слышит. Простите мя и помолитеся о мне.
