Авва Дорофей - Аскетика. Том I
Ответ. Бог небесе и земли да даст вам, молитвами святых Своих, прошения, яже прошу Его вам подати. Понеже убо услышати хощете, и возрадоватися, вы есте понуждающии мя рещи, яко да на мне исполнится оное: «бых несмыслен хваляся, вы мя понудисте» (2 Кор. 12, 11). Аз и прежде даже не просити мя, за раздеженную во мне, аки зелнейший пламень огненный любовь Христа, иже рече: взыщи ближняго твоего яко сам себе, от горения и теплоты Духа, не престаю день и нощь моляся Богу, да сотворит вас богоносных, и вселится и да ходит в вас, и ниспослет вам Духа Святаго, Духа истины, да егда приидет, научит вы всему, и наставит вы на истину, еже быти наследником вечных благ онех, ихже око не виде, и ухо не слыша, и на сердце человеку не взыдоша. И бых к вам аки отец, тщайся увоинити чада своя царю в воинства светла, онем без попечения сущим. Да даст же Бог вам горение любве сея.
Известны бо сотворит вы Бог, яко до седмаго небесе возводит человеки имущыя тую, якоже нецыи уже со дерзновением восходят, и благословляются, аще в теле, не вем, аще ли кроме тела, не вем; Бог бо есть ведый, и да разумеете начало пути радости сея, послушайте: прежде приходит человеку Дух Святый, таже научает и всему, и како подобает смиренномудрствовати (яже не можете ныне услышати), таже наставляемь первым горением онем, восходит на небо первое, по сем на второе: и по преуспеянию, даже до седмаго. И тамо есть видети неизреченныя вещи и страшныя, яже никтоже может слышати, точию приходящий в меру сию, ее же Господь да сподобит вас. Умирающий совершенно мирови, терпением, и скорбми многими, могут в сию приити. О брате возлюбленне! Господь крест претерпе, и ты не возрадуешися ли во скорбех, ихже терпение вводит в Царствие Небесное? Добре же рекл еси, яко скорбиши; не веси ли, яко егда кто просит отцев помолитися о нем, или Бога, еже дати ему помощь, тогда множатся ему скорби и искушения ко искусу его. Да не взыщеши убо покоя телеснаго, аще не дает ти того Господь. Мерзок бо пред Господем покой телесный и Господь рече: «в мире скорбь имети будете» (Ин. 16, 33). Бог да поможет ти во всех. Помолися о мне.
113. Тойже вознепщевав смерть тогожде великаго старца близ быти, и прискорбен быв о своем спасении, и всего общежития: яви сие томужде великому старцу. Иже и сказует ему сия:
Брате любезнейший: подвигнувся по любви Божией, глаголал еси глаголы смирения, влекущия на сострадание и немилостивыя человеки, к человеку грешну и худейшу.
И что имам ти рещи, человек, не имый сострадания, ниже милосердия? Обдержим есмь от твоих словес, и что дам ти, не имам? Аще бых имел нечто, могл бых ти рещи. Не оставляю вас еще в сих летех, ниже в сие время сирых: но се пребуду с вами, повелением Бога, творящаго к пользе вся, и ко спасению душ наших, рабов Его, не мене ради, но вас ради просивших сего, яко да плод принесете Богови, чрез мене приносяще ваше спасение. И аз реку: «се аз и дети, яже ми дал еси, соблюди я во имя Твое» (Ис. 8, 18; Ин. 17, 11); покрый их десницею Твоею; настави нас в пристанище хотения Твоего и напиши имена их в Твоей книзе: даждь им обручение жизни, радость творя им, и глаголя: «не бойся малое стадо, яко благоизволи Отец ваш дати вам Царство» (Лк. 12, 32). И помолися, да даст ми рещи: Отче, даждь ми, да идеже буду Аз, будут и чада Моя. Веру ми ими, брате: яко дух мой усерден есть рещи моему Владыце, радующемуся о прошении рабов Своих: Владыко, или введи со мною и чада моя в царство твое, или и мене изглади от книги Твоея. Немощь же моя и нерадение возбраняют ми имети таковое дерзновение. Но обаче милость Его велия есть. Имуще убо таковаго Владыку да утешимся, верующе, яко всячески сотворит милость свою с нами. Не имать Бог презрети труда подвигов отец наших усопших и ныне живущих; но речет: пощажду место сие, Мене ради и работающих Мне верно на нем. Аз бо верую несумненно, яко суть нецыи на месте сем, могуще умолити Бога о тмах людей, и не будут отметаеми; волю бо их, сотворит Господь. И упросите могут, да очи Господни будут на месте сем. Молитвы бо их восходят к Нему, яко молния блистающая, и якоже лучи солнечны, о нихже веселится Отец, и радуется Сын, и красуется Дух Святый. Себя убо да внимаем точию, брате, Бог бо печется о месте сем: упокоение бо бысть рабов Его, и на сих исполняется оное: «глас радования и спасения в селениих праведных» (Пс. 117, 15). Прочее, десницы Господни есть, еже сотворити силу, еже дати нам крепость, даровати нам последовати стопам отец наших, сиречь, учению, житию, долготерпению, любви, терпению, гонением, страданием, елика быша им от врага, и чувственне и мысленне. Аще бо не стяжем что от жития их, то како будем чада их? Господу глаголющу: «аще чада Авраамля бысте были, дела Авраамля бысте творили» (Ин. 8, 39). Аще не страждем с ними по силе немощи нашей, како прославимся с ними, в час оный; аще не умрем с ними, отсекающе волю, то како совостанем с ними, во уповании услышати оное: «Приидите благословеннии Отца Моего, наследуйте уготованное вам Царство» (Мф. 25, 34) и прочая. Брате, аще прошения наша даде нам Бог, да имамы отцы наши наставляющыя нас; внимаем, да не леность наша, или мягкость, или нерадение, или неверие наша разлучит нас от них. Глаголет бо: «аще ли неверный отлучается, да разлучится» (1 Кор. 7, 15). Да воспомянем рекшаго, яко «претерпевый до конца, той спасен будет» (Мф. 10, 22). Да молимся Богови непрестанно, о еже ни единому же отлучитися от святых отец наших, ниже в веце сем, ниже в грядущем. Да не оставим света, и взыщем тмы; не оставим сладости медвенныя, и приимем горесть змиеву; да не завидим сами себе, и возлюбим смерть; да не приимем вместо благословения клятвы. Да не прогневаем Христа, угождающе врагу. Трезвимся, бодрствуем, скоро да потечем; готови да будем; пробудимся от глубочайшаго нашего сна. Помыслим, что нам даровал есть Бог, не еже быти нам под ногами святых, но и чадом, и наследником. Блаженна есть душа, вкусившая сих. Блаженна душа, уязвившаяся в таковую любовь. Блаженна душа, прилепившаяся сим. Блаженна душа, приемшая совершенство в сих. Ожидает бо ю радость и веселие, и мздовоздаяние в Царствии Небеснем, во славу Отца, и Сына, и Святаго Духа, аминь. Молися о мне, брате.
111. Прошение молитвы тогожде к томужде великому старцу, яко да дарует ему Бог преуспеяние.
Ответ. Брате, умоли благость «хотящаго всем человеком спастися, и в разум истины приити» (1 Тим. 2, 4) еже дати тебе бодрость духовну, возгневающую духовный огнь, егоже Господь прииде воврещи на землю, Владыка небесе и земли. Молю же купно и аз по силе моей, да дарует ти оную Бог, подаваяй всем с трудом и усердием, просящим благодати, и пришедши наставить тя на истину. Просвещает бо очеса, исправляет ум, отгонит сон слабости и безпечности, уясняет оржавелая в земли лености оружия; просвещает оскверненная в пленении варварском одеяния, и творит еже возненавидети мерзости мертвечин их, и возжелати насытитися духовныя оныя жертвы, жремыя великим нашим Архиереем: о нейже слыша пророк, яко очищает грехи, и отъемлет беззакония, плачущим прощает, смиренным дает благодать: в достойных снискивается, и они живот вечный тою наследуют, о имени Отца и Сына, и Святаго Духа. Аминь. Помолися о мне.
114. Тойже моли великаго старца помолитися о нем, яко да сподобится мертвенности Иисусовой себе в жертву принести.
Ответ. Всякое прошение благо, радуяся прошу Бога подати вам, и верую, яко подает. Неложен бо есть глаголяй: «просите и дастся вам» (Мф. 7, 7). Бог убо да подает прошения ваша, аминь. Обаче да не будеши без попечения во еже и самому потрудитися мало. Ибо хотящий началств от царя, аще и имут многих предстателей, претерпевают и сами скорби, и беды, и труды, дондеже получат: тако и ты убо, привнеси мал труд, да обрящеши велию милость. «Много бо может молитва праведнаго поспешествуема» (Иак. 5, 16). Рцы брату сущему с тобою, возлюбленному оному о Господе, присно тя наказующему и оттуду подающему милость велию, да не обленится, наказуя. «Егоже бо любит Господь наказует» (Евр. 12, 6). Целую всех вас о Господе и прошу помолитися о мне за любовь.
115. Тойже моли великаго старца помолитися о нем, еже изыти ему от ветхаго человека.
Ответ. Послушай, брате возлюбленне, и даждь сердце твое, еже сохранити глаголемыя тебе Божественныя глаголы, не от человека, но от Духа Свята. Иисус врач есть душ и телес. Аще язву имаши, ввожду тя к нему, и молю его, да исцелит тя, аще и ты восхощеши. Датель бо есть всех благих дарований. Подает же тебе не точно прошения твоя, но паче вся по преизбыточествию, ихже просиши. Сын Божий, и Свет и Сила есть Иисус, от Святыя Девы Марии воплощся, Иже на земли явися и с человеки поживе, и Себе принесе жертву живу, благоугодну Богу, и Отцу нашему, еже сотворити нас Себе люди избранны, ревнители добрым делом, царское священие, язык свят, Иже сия нас ради претерпев, образ нам оставил есть терпения, и радуется, егда просим Его. Прошу Его просветити сердце твое; но спотрудися до пота и ты. Глаголет бо Сын Божий: «приидите ко Мне вси труждающиися и обремененнии, и Аз упокою вы» (Мф. 11, 28). Приступаю убо к Нему о тебе со безстудием многим, но аще и ты не приступиши, то срам есть велик. Иисус никогоже отметает: ибо в единонадесятый час нанят делатели в Свой виноград. Прилепися Ему, и сотвори мал труд, да восприимеши мзду со всеми равную. Человек бысть Сын Божий тебе ради, буди и ты Его ради богом. Ум дал есть тебе Бог, даждь Ему оный на небо, вышних ища, вышняя мудрствуя, идеже Сам есть. Молю бо да тамо достигнеши со всеми любящими имя Его. Таковым бо образом, свобождается кто ветхаго человека. Иисус рече апостолом: «вы есте соль земли» (Мф. 5, 13). Землею тело нарече; глаголет бо: «земля еси, и в землю отыдеши» (Быт. 3, 11). Буди сам себе соль, осоляя и изсушая гнилость и черви, си есть злыя помыслы. И аще сие сотвориши, спотруждуся, и соосолю купно с тобою, да не возсмердят и гнушатися сотворят инем. Спастися хощет нам Бог и Свет наш, но нам подобает вопити непрестанно: спаси мя, Господи, и спасет тя. Ибо возопиша некий, и внидоша в пристанище хотения Его, в неже надеюся тебе прияти, аще ми даси руку посиле. Уразумей реченная, и последовав достигнеши, по рекшему: «тако тецыте, да постигнете» (1 Кор. 9, 24). Молися о мне, брате, да не осужден буду, глаголя, и не творя.
