Авва Дорофей - Аскетика. Том I
Ответ. Вся яже написал еси прося Бога чрез мою худость, брате забытливе, во едино клонят, еже избавитися ветхаго человека, и еже обрестися освящению души и тела, и спасену быти со святыми во Царствие Божие. Сия бо то есть мера, юже рех ти, еже изменитися и очиститися от ветхаго человека. По преизбыточествию же ихже просиши, прошу Бога аз, обдержим любовию, да подаст тебе. И аще не воспятиши слабостию своею и нерадением, то почудитися имаши, и прославити Бога, како пременяет тя, от еже не быти, во еже быти. Бог да простит ти яже согрешил еси, и имущими быти по сих, да уготовает тебе прощение. О нощных же мечтаниях: по зависти искушает тя диавол, зане каешися Богу, хотя наругатися тебе, яко ничтоже пользует вся могущее покаяние. Но ты не повинися, ибо великую имаши помощь от молитв святых. Тщание же есть: аще совосхитишися словом, или делом к некоему согрешив, да идеши и сотвориши метание тому. И видя Бог, покрыет тя от врагов твоих. О снедех же: да не весма попецемся о теле. Случается бо, яко бывает сия брань от бесов, да ввергут нас в попечение, и да в сем забавляющеся, оставим предлежащая нам благая. О совершении же пути Божия, не лет есть рещи ныне, да не во отчаяние приведу тя. Но веруй, яко туне тя спасает Бог молитвами святых: могут бо Его умолити. Помолися о мне брате.
Вопрос 115, тогожде к томужде великому старцу: о унынии, и других неких помыслех.
Ответ. Един Бог безгрешен, спасаяй надеющияся нань, да укрепит любовь твою, еже служити Ему в преподобии и правде вся дни живота твоего, во храме жертвенника внутренняго человека, в немже мысленныя жертвы приносимы бывают Богови, злато, и ливан, и смирна, в немже жрется телец упитанный, кропится честная кровь непорочнаго Агнца, в немже воскликновения святых Ангел с согласием бывают: тогда «возложат на олтарь твой телцы» (Пс. 50, 21). Тогда, когда? Егда приходит Господь наш, великий Оный Архиерей, Иже безкровную жертву приносяй и приемляй. Егда во имя Его услышан будет во ушию седящаго у красных врат хромаго, глас радости: «востани и ходи» (Деян. 3, 6), тогда входит во святилище, ходя, и скача, и хваля Бога. Тогда престает сон уныния и невежества: тогда упражняется дремание уныния и лености от веждей; тогда вжигают мудрыя пять девы оны светилники своя, и ликуют с женихом во святем чертозе, согласно поющия между собою без плищя: «вкусите и видите, яко благ Господь: Блажен муж иже уповает нань» (Пс. 38, 9). Тогда упраздняются брани, и осквернения, и движения, и водворяется мир святый Святыя Троицы, и печатлеется сокровище, и некрадомо пребывает. Помолися, да уразумееши и достигнеши, и возрадуешися, о Христе Иисусе Господе нашем, Емуже слава вовеки, аминь.
116. Тогожде к томужде великому старцу: о искушении сокровенном и успеянии.
Ответ. Удивляюся любви твоей, брате, како не поразумеваеши хитростей бесовских! Зане, якоже свидетельствовал есть Бог Иову, раздражишася на него: и яко поразумеша, яко близ бе, еже очиститися отроку, стрясоша его: тако и егда видят никоего во успеяние пришедша, искушают его по зависти. Не искушают же пришедшаго во успеяние от своих дел, сей бо победил есть их; но пришедшаго молитвами святых туне, по попущению Божию, да познает свою немощь, и не возвысится о даровании. Якоже воинства многа суть преимуща друг друга: тако суть, и обители у Отца светов, преимуща едина другую. Аще бо не сице, то почто многи? Бог да укрепит тя в страсе Своем. Помолися о мне.
117. Вопрос тогожде к томужде великому старцу, о успеянии души, и о научении к брату, и о вере к общему отцу.
Ответ. Веру ми ими вожделеннейше, яко, с Богом, не вне стоиши врат Царствия Небеснаго, но стани добре, внимая себе со опасением, еже не быти изриновену оттуду. Божие бо есть, еже ввести человека молящихся ради святых своих: человека же есть, еже пребыти, или изриновену быти. И по восхождению волею Божиею в превосходства тебе веду. Благодушествуй убо о Господе и усердно ходи в пути Его (и приимеши от Него) помощь о имени Его. О брате же: смиренным сердцем приими его, и глаголи ему, аще что послет Бог, в сердце твое, рещи, внемля, яко потребе бывшей, и ослу уста отверзе. И аще от Него есть все, то пользу, тобою бывшую, Тому припиши. И аще увидит твое смирение Бог, тебе приписует мзды научения, давый во уста твоя слово тое. И исполняется на вас писанное: «Брат от брата помогаем, яко град тверд и огражден» (Притч. 8, 9). Господь Иисус Христос да поспешит вам вся во благое. О худейшем же рабе: аще Бог дарова тебе веру, то Той есть, и растяй, и храняй. Не может бо кто худейший открыти тайну человеком, но Бог бывает вся во всех. Прости, брате, и помолися о мне.
Вопрос 118, тогожде к иному старцу:
Что сотворит хотяй безмолвствовати за имя бываемое ему, да не когда то, еже есть паче его, повредит его, якоже рекоша отцы, яко горе человеку оному, егоже имя более есть дела его; и должен ли есть с некиими беседовати, или ни со единем отнюд.
Ответ. Еже имети кому имя или славу паче делания своего, ничтоже вредит не соуслаждающагося, или не слагающагося глаголемым, якоже и о оклеветаемом о убийстве, и ничтоже таково содеявшем. Должен же есть таковый помышляти, яко имут о мне человецы мнение благое, и не ведят, кто есмь. А еже со овыми убо собеседовати, со овыми же ни, или отвергати убо некия, некияже приимати, приводит сие кого, во еже разсуждати человеки. Могий убо безпопечителен быти (по неразумию моему глаголю) добре творит, познав свою немощь.
Вопрос 119, тогожде к великому старцу:
Молю тя отче честный, сниди моей немощи, и повели ми, да аще кто от отец восхощет приити в келлию, во еже сотворити ми молитву, прииму его, — уведех бо себе отягченна от уныния, — дондеже Бог молитвами вашими утвердит мою душу.
Ответ. Молю любовь твою, брате мой, не поставляй мя горе, не смыслен бо есмь, и взимаюся, и должен бех познати, яко низу есмь; еже бо рещи, сниди, знаменует, яко горе сежу на высоте. И не веси ли, яко истязуем быти под всяким человеком сый низу не имать камо снити. Увещание имаши святаго апостола Павла глаголюща: «вся искушающе, добрая держите» (1 Сол. 5, 20). Всякая вещь, юже аще сотворит человек со страхом Божиим, пользует душу его. Аще бо пользует тя беседа, аз не возбраняю от тебе пользы, но и попрание есмь приходящих помолитися о тебе и пользовати. Или убо сретаешися, или ни, Господь Иисус да укрепит твою искреннюю любовь. Что бо вменяюся в человецех, да и сего от себе истяжу? приобретение твое, моя радость есть. Беседуя убо с приходящими святыми и пользуяся, проси их помолитися о мне любве ради. Сие же непщую: яко еже беседовати Бога ради, добро есть; и еже не беседовати Бога ради, добро есть. Здрав буди.
120. Тогожде к томужде великому старцу прошение молитвы, и о совершенном безмолвии.
Ответ. Господь наш Иисус Христос, Сын Благословеннаго и Вышняго Бога, да укрепит и утвердит вас, в приятие Святаго Своего Духа, да благим пришествием Своим научит вас о всех, и да просветит сердца ваша, и наставит вас на истину; и да увижду вас яко финикс процветшии в раи Божии, и да обрящетеся, яко маслина плодовита посреди святых, и яко лоза плодоносная на Божественней ниве, вся истинна. Да сподобит же вас Господь пити от источника премудрости. Елицы бо пиша от него, забыша себе, вси вне бывше ветхаго человека, и от источника премудрости наставишася на ин источник любве, никогдаже падающия, и в сем бывше чине, достигоша непарительныя и не высящияся меры, вси ум бывше, вси око, вси светли, вси совершенни, вси Бози. Потрудишася, возвеличишася, прославишася, просветишася, ожиша, понеже прежде умроша. Веселятся и веселят: веселятся о нераздельней Троице, и веселят вышния Силы. Возжелайте чина их, тецыте путем их; поревнуйте вере их: стяжите смирение их, терпение во всех, да обымете достояние их. Непадательную их любовь удержите, да обрящетеся в неизглаголанных благих, «ихже око не виде, и ухо не слыша, и на сердце человеку не взыдоша, яже уготова Бог любящим Его» (1 Кор. 2, 9). О безмолвии же: ныне обучай себе еще мало, и Бог сотворит милость Свою.
121. Томужде великому старцу, аще попустит ему совершенное безмолвие.
Ответ. Рех любви твоей, возлюбленне брате, о безмолвии, еже пождати несколко: не яко не хотяй приити тебе во устроение таковыя меры, да не будет, но желая и моляся, да дарует ти оное Бог, и множае. Ибо радость моя велия есть, ваше всех успеяние. Дарования же суть духовна от Бога даема во времена своя: и Сам призывает, и помогает, и хранит. Глаголет бо: яко «не хваляй себе, сей искусен есть, но егоже Господь восхваляет» (2 Кор. 10, 18). Аще убо дом свой хощеши наздати, прежде уготовай вещество, и вся потребная: и художнику остается еже приити и создати. Суть же потребная таковаго здания: вера твердая в наздание стен; древяная оконца световидна вводящая свет солнечный, ко еже осветити дом, да никая же тма обрящется в нем. Оконца же древяная суть, оная пять чувств, честным крестом Христовым утвержденная, и вводящая свет мысленнаго Солнца Правды, и не оставляющия вмещати ниединуже тму, врага глаголю и доброненавистна в дому твоем. Прочее хощеши ли покрова, покрывающа дом, да ни во дни солнце не ожжет тебе, ниже луна нощию? Сказуется же покров, любы к Богу, яко николиже падает покрывающи дом, и не оставляющи солнца зайти во гневе нашем, да не обрящем е клеветником в день судный, жгущим нас во огни геенском, ниже луну свидетельствующу, о нощном нашем унынии и лености.
