Авва Дорофей - Аскетика. Том I
Вопрос 544. Брат вопроси великаго старца, глаголя: догматическия книги имам, и читая в них, ощущаю, яко преносится ум мой в видение тех от страстных помыслов. Иногда же запрещает мне помысл, глаголя: не должен еси чести, окаянен сый и нечист.
Ответ Варсануфия. Не бых хотел в сих, за неже тыя горе взимают ум, но во словесех старец, яко сия смиряют долу ум. Аз же не яко безчестя тыя рех, но яко советуя: есть бо пища, и пища.
545. Брат некий странный больный, прииде во общежитие врачевания иский. И дан бысть в келлию единаго брата, и тяжце понесе брат той, и уразумев старец, сказа ему сия.
Испытай помысл твой, о брате! И уразумей, аще бы был брат твой по плоти, не восхотел ли бы еси прияти его на вежде свои? Виждь убо, како плотская делаются с тобою. Приял бо еси духовнаго твоего брата: вси бо едино есмы о Христе. Внемли убо себе, брате, во страсе Божии.
Сия слышав брат, умилися зело, и пользу прием, явил есть старцеви глаголя: прости мя, господине авво, и помолися о мне. И приемлю брата моего с великою радостию.
Вопрос 546. Брат быв тогожде старца Варсануфия, прежде неже безмолвствовати ему во общежитии аввы Серида, устранися. И возвращся уничижаше некоего брата благоговейна, аки невежду суща и ничтожна. Пребысть же просяй старца наставити его в первое, рекл: Бог приведе мя до твоей святыни.
Ответ. Глаголет апостол: «Царство Божие не в словеси» (1 Кор. 4, 20). Рече авва Макарий: право верующаго и во благочестии трудящагося, Иисус не предает во страсти в руки бесов. Господь рече, яко многи вдовицы беша во дни Илиины во Исраили, и ни ко единой их послан бысть Илиа, токмо в Сарепту Сидонскую (к жене вдовице), аще и еллинска бяше. И паки рече: мнози прокаженни бяху во дни Елиссеевы во Исраили: и ни един же от них очистися, токмо Нееман Сирианин; аще бо и иноплеменник бяше, но верова. Темже непщевах, яко устранився, оставил еси оправдание и стяжал еси смирение. И яко же вижду от помыслов твоих, яко оный самый еси или и горший. Аще «буяя и уничиженная, и ничтожная мира избра Бог» (1 Кор. 1, 27, 28), то яве есть, яко славная, и имущая похвалу у человек отверже. Не убо угодная человеком, угодна, суть и Богови: но безчестная у человек Бога ради, имут блаженство пред Богом. Якоже глаголет, яко «блажени будете, егда разлучат вы человецы и возненавидят, и пронесут имя ваше яко зло, имене Моего ради: радуйтеся и взыграйте, яко тако творяху пророком отцы их» (Лк. 6, 22, 23). Воспитан был еси купно с нами время не мало: испытай сердце свое, кую вину, кий совет имей еси от нас отсецающий тя от пути Божия? И покров бывший на тебе, откуду тебе бысть? Точию от скорби, юже претерпел еси, яко изгна тя старец на пользу твою. Рцы ми, брате, начало человека Бог ищет, или последних яже сбудутся с ним? Ты убо веси, что притяжал еси во время странствия твоего. Паки веси, яко живущу ти купно со мною тогда, рех: яко аще слушаеши мя в едином, и противоглаголеши мне во едином, то и в немже слушаеши, воля твоя есть в том и не имам осуждения дати за тебе ответ. Аще Бог приведе тя, то Он и управит тя; аще ли же волею своею, то писано есть: «Отпустих я по начинанием сердец их» (Пс. 80, 13). Темже убо помолися о мне и буди без попечения от нас. И аз хощу во всех без попечения быти о Господе.
Вопрос 547. Братия изшедше от общежития некоего купиша себе келлии в пределх, в нихже бе общежитие сие, без совета аввы своего. И прискорбен быв на них авва Серид, яко на преступльших чин, хотяше изгнати их оттуду: они же противоречити начаша. И вопрошен бысть тойжде старец о сем, добре ли сотвориша братия тии и что подобает сотворити?
Ответ. Всюду обретаем, яко прекословие многи человеки погубило есть. Якоже и Дафана и Авирона сопротивльшияся Моисеови: и сие знамение есть зло. Яко, аще аввы своего не устрашишася, то кого имут усрамитися? А еже не срамлятися кому, знамение есть бунтования помысла, а сие бунтование наущения есть диаволя. Из начала бо возбунтовася диавол. И творящии тожде, чада его бывают. И кая вина бывает сим? Таковии изгнанием изгнаша себе от смирения, затыкающе уши своя не услышати глаголюща: «аще гонят вы во граде сем, бегайте в другий» (Мф. 10, 23). И «хотящему судитися с тобою, и ризу твою взяти, отпусти ему и срачицу» (Мф. 5, 40). Они же злу повинушася. А злое ничтоже благо раждает. Глаголет бо: «не может древо зло плоды добры творити» (Мф. 7, 18). Попраша же чин святых отцев, в преступлении своем, отцы бо глаголют: яко, аще отыдеши поселитися на некоем месте, то первее вопроси, да не когда оскорбится кто в поселении твоем. И аще о инех заповедуют тако отцы, кольми паче идеже есть скорбь игумену таковаго человека? Конец же вещи сея, тако должен есть быти: да тии убо, аки согрешшии, поймут и ины, и да просят авву своего простити им и не воздати зла за зло: а сей, да простит им. Писано бо есть: «яко, должни есмы мы силнии немощи немощных носити» (Рим. 15, 1). И Господь глаголет: «аще не отпущаете человеком согрешения их, ни Отец ваш Небесный отпустит вам согрешений ваших» (Мф. 6, 15). И паки: «будите совершени, якоже Отец ваш
Небесный совершен есть» (Мф. 5, 48). И тако прославится Бог, от еже быти ему в назидание многих.
Вопрос 548. Авва сего общежития, в немже быша и ины святии старцы, завеща некоей вещи быти. А нецыи из братий, имуще волю, тяжце понесоша и роптаху. И сие уразумев тойжде великий старец сказа им ответ сей: братие, рече Господь: «Овцы Моя гласа Моего слушают, и по Мне грядут» (Ин. 10, 27) и прочая. Аще кто убо истинен ученик есть, то во всех послушен пребывает авве своему до смерти. И во всех, яже творит авва его, созидается, и не смеет разсудити глаголемая; ниже рещи: почто сие? И на что сие? Понеже не будет ученик аввы своего, но судия. Сия же вся не бывают, разве точию от злейшия воли человечи. Аще убо авва некоего, речет быти вещи некоей, воспрекословит же ученик: то явно есть, яко слово свое хощет поставити и упразднити слово аввы своего. Разсуждает убо таковый, кто есть авва, той ли, егоже упразднися слово, или егоже слово бысть? Аще убо хощет кто волю свою сотворити, то сын есть диаволь. И аще кто творит волю таковаго, то волю диаволю творит. Аще ли же и сотворит сей волю свою, то ни тако приимет покой. И что суть яже посреде? Точию непослушание: еже есть погибель души. Аще убо кто видит себе о авве своем соблазняющася, то должен есть отыти от него, и не погубити душу свою, и понести осуждение за инех, ихже развращает: не ведая, добре ли, или зле сотворил есть авва, но соблазняяся безвременно за волю свою, зане аще и сотворися воля его, праведнее аввы своего никтоже бе. Аще ли же добрее аввы своего весть полезное, то почто еще и ученичествует у него? Да отыдет и сам и да научит инех. Не прельщайтеся от диавола, и не пребудете имуще волю вашу, на вред ваш. Никогдаже бо бывает воля ваша. Злоба бо злобу не отъемлет. Но егда оставите волю вашу Богови, то Той сотворит, якоже хощет. Аз, братие, якоже весть Бог, щадя вас написах вам. Аще убо кто приемлет, будет тому во спасение. И аще кто не приемлет, аще восхощет и плюнути на написанная, в том есть. Якоже уже нецыи в сердце своем, ницыи же и усты клеветаша на ны. Простите ми.
Ответ 549, тогожде великаго старца к некоему от отцев, вопросившу, подобает ли крепкою епитимиею наказати ученика своего прекословящаго?
Брате возлюбленне! Разумей время сие, яко лукаво есть. Понеже добро и чудно есть наказание, и многа имать свидетельства. Глаголет бо: «Егоже любит Господь, наказует» (Евр. 12, 6). И паки: «Блажен человек егоже аще накажеши Господи» (Пс. 93, 12) и прочая. Брат сей от жестосердия ратуем есть. Но претерпи, и спотрудися с ним. И «обличи, запрети, умоли», по апостолову слову (Тим. 3, 2), и аще приимет сие наказание, то паки приобретен будет. Возбуди его от тяжчайшаго сна жестосердия. Аще бо одебелеет кожа терния его, то плач о нем велий и нестерпимый. Аще ли же потрудится восторгнути терния, дондеже суть былия, то может вскоре избавитися таковыя страсти. Аще ли же ожесточится тернийце оно, то трудом и подвигом с болезнми восторгнутися имать. Рцы убо ему внимати себе тщательно.
Ответ 550, тогожде великаго старца ко брату древодельство делающему во общежитии, и от различных помысл ратуемому, и помыслившу: яко ничтоже пользуюся зде, ниже приях зде некую помощь.
Брате, мы есмы не хотящии избавитися от злых дней, и лютых скорбей. Два бо дарования даде Бог человеком, имиже могут спастися, и избавитися от всех страстей ветхаго человека: смирение и послушание.
И не восхищаем я, ниже хощем в них жительствовати, ниже прейти теми, да обрящем помощь и избавимся от зол и прилепимся теми ко великому врачу Иисусу, могущему нас уврачевати от запаления их. Почто собираеши вся злая в сокровищи твоем, и смущаешися, и тужиши? Престани от еже быти гневлив, яростлив же, и завидлив. Разумей, яко таковии безчестни, а не почтенни суть. Остави вся развращения, и приклони выю к смирению и послушанию, и обрящеши милость. Аще со смирением и послушанием сотвориши, что-либо слышиши, то не точию дело, еже ныне твориши, благопоспешит Господь в руку твоею, но и вся дела твоя успеют. Путь бо боящихся Его хранит и покрывает шествия их. Что негодуеши? Что любопришися? Милость Божия поможет то, аще пребудеши постоянно, в терпении Божии умри, окаянне, от всякаго человека. Рцы помыслу: кто есмь аз? Земля, и пепел, и пес. Рцы: отнюд вещи не имам: что волхвуеши тебе самому погибель, и не боишися Бога? Не срамляешися ли, глаголя: не приях зде помощи? Ослепляет сатана сердце твое, приводя тебе в неблагодарение, яко не пользуешися во святем месте сем. Неразумне человече! Аще не бы рука Божия и святыя молитвы сущих зде святых сохраняли тя, то где бы имел еси быти? Разве точию во тме кромейшней. Где бы могл еси пользоватися тако? Нигде же. Но диавол хотя отчуждити тя от приискренняго союза со святыми, покрова же их и пользы, сеет в тя семя смерти в погибель, да совершенне приидеши в руки врагов истины, и расторгнут агницу, душу глаголю. Не внимай кому уничижая или ругайся: тебе бо уловляют, о сих тя смущающе, тебе вредят изгнанна тя творяще от тишины и мира, благопостоянства же и разума и всякаго блага. Остави сия, и последуй словесем моим, и буду носити бремя твое: и обрящеши помощь и милость и спасение души твоей. Со трудом спасаемся, брате. Нуждне же сохранися не рещи: что сие? почто сие? почто не имам равная с сими, или с сими? Малое рукоделие твори прилежне со страхом Божиим, о немже не малу имети будеши мзду. И да не отчаешися себе: радость бо диаволя есть сия. Еюже не даст ему Бог возрадоватися, но восплакатися паче о спасении твоем, о Христе Иисусе, Господе нашем, Емуже слава вовеки. Аминь.
