Александр Гопаченко - Молитвенник
Священник продолжает:
Поминающе убо спасительную сию заповедь, и вся яже о нас бывшая: крест, гроб, тридневное воскресение, на небеса восхождение, одесную седение, второе и славное паки пришествие.
Св. Твоя от Твоих Тебе приносяще о всех и за вся.
Л. Тебе поем, Тебе благословим, Тебе благодарим, Господи, и молим Ти ся, Боже наш.
Священник молится
Еще приносим Ти словесную сию и бескровную службу, и просим и молим и милися деем, ниспосли Духа Твоего Святаго на ны и на предлежащия дары сия.
Господи, Иже Пресвятаго Твоего Духа в третий час Апостолом Твоим ниспославый, Того, Благий, не отъими от нас, но обнови нас молящихтися.
Стих: Сердце чисто созижди во мне, Боже, и Дух прав обнови во утробе моей.
Господи, Иже…
Стих: Не отвержи мене от лица Твоего, и Духа Твоего Святаго не отъими от мене.
Господи, Иже…
Священник благословляет трижды Св. Дары:
И сотвори убо хлеб сей, честное Тело Христа Твоего. Аминь.
А еже в чаши сей, честную Кровь Христа Твоего. Аминь.
Преложив Духом Твоим Святым. Аминь, Аминь, Аминь. И продолжает:
Якоже быти причащающимся во трезвение души, во оставление грехов, в приобщение Святаго Твоего Духа, во исполнение Царствия небеснаго, в дерзновение еже к Тебе, не в суд, или во осуждение.
Еще приносим Ти словесную сию службу, о иже в вере почивших: праотцех, отцех, патриарсех, пророцех, апостолех, проповедницех, евангелистех, мученицех, исповедницех, воздержницех, и о всяком дусе праве днем в вере скончавшемся.
Приняв кадило, священник возглашает:
Изрядно о пресвятей, пречистей, преблагословенней, славней Владычице и Присно деве Марии.
И кадит пред св. Престолом. Затем, диакон кадит св. Престол окрест и поминает усопших и живых.
Лик поет: Достойно есть яко воистинну блажити Тя Богородицу присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без нетления Бога Слова рождшую, сущую Богородицу Тя величаем [9].
Во все дни Цветной Триоди до отдания Пасхи поется:
Ангел вопияше Благодатней: Чистая Дево, радуйся! И паки реку: радуйся! Твой Сын воскресе тридневен от гроба, и мертвыя воздвигнувый; людие, веселитеся!
Светися, светися, новый Иерусалиме: слава бо Господня на Тебе воссия; ликуй ныне и веселися, Сионе: Ты же чистая красуйся, Богородице, о восстании рождества Твоего.
На Литургии св. Василия Вел., кроме Вел. Четверга и Вел. Субботы, поется:
О Тебе радуется, Благодатная, всякая тварь, Ангельский собор и человеческий род: освященный храме и раю словесный, девственная похвало, из Нея же Бог воплотися и младенец бысть, прежде век сый Бог наш; ложесна бо Твоя престол сотвори, и чрево Твое пространнее небес содела. О Тебе радуется, Благодатная, всякая тварь, слава Тебе.
Священник молится
О святем Иоанне пророце, предтечи и крестители, о святых славных и всехвальных апостолех, о святем (имя), егоже и память совершаем, и о всех святых Твоих, ихже молитвами посети нас, Боже.
И помяни всех усопших о надежди воскресения жизни вечныя.
И поминает… усопших по именам.
И упокой их, и деже присещает свет лица Твоего.
Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство, и всякий священнический чин.
Еще приносим Ти словесную сию службу, о вселенней, о святей соборней и апостольстей Церкви, о иже в чистоте и честнем жительстве пребывающих; о предержащих властех наших и о христолюбивом воинстве. Даждь им, Господи, мирное правление, да и мы в тишине их тихое и безмолвное житие поживем во всяком благочестии и чистоте.
Возглас: В первых помяни, Господи, Святейших Патриархов Православных, и Господина нашего Митрополита (или Архиепископа,
или Епископа), ихже даруй святым Твоим Церквам, в мире, целых, честных, здравых, долго действующих, право правящих слово Твоея истины.
Л. И всех и вся.
Священник молится:
Помяни, Господи, град сей, в немже живем (весь сию, в нейже живем; обитель сию, в нейже живем), и всякий град и страну, и верою живущих в них. Помяни, Господи, плавающих, путешествующих, недугующих, страждущих, плененных и спасение их. Помяни, Господи, плодоносящих и добротворящих во святых Твоих церквах, и поминающих убогия, и на вся ны милости Твоя ниспосли.
И поминает по именам… живых
Св. И даждь нам единеми усты и единем сердцем славити и воспевати пречестное и великолепое имя Твое, Отца и Сына и Святаго Духа, ныне и присно и во веки веков.
Л. Аминь.
Св. И да будут милости великаго Бога и Спаса нашего Иисуса Христа со всеми вами.
Л. И со духом твоим.
Просительная Ектения
Д. Вся святыя помянувше, паки и паки миром Господу помолимся.
Л. Господи, помилуй.
Д. О принесенных и освященных честных дарех Господу помолимся.
Л. Господи, помилуй.
Д. Яко да человеколюбец Бог наш, приемь я во святый и пренебесный и мысленный Свой жертвенник, в воню благоухания духовнаго, возниспослет нам Божественную благодать и дар Святаго Духа, помолимся.
Л. Господи, помилуй.
Д. О избавитися нам от всякия скорби, гнева и нужды, Господу помолимся.
Л. Господи, помилуй.
Священник молится:
Тебе предлагаем живот наш весь и надежду, Владыко человеколюбие, и просим, и молим, и милися деем: сподоби нас причаститися небесных Твоих и страшных Таин, сея священныя и духовныя трапезы, с чистою совестию, во оставление грехов, в прощение согрешений, во общение Духа Святаго, в наследие царства иебеснаго, в дерзновение еже к Тебе, не в суд или во осуждение.
Д Заступи, спаси, помилуй и сохрани нас, Боже, Твоею благодатию.
Л. Господи, помилуй.
Д. Дне всего совершенна, свята, мирна и безгрешна, у Господа просим.
Л. Подай, Господи.
Д Ангела мирна, верна наставника, хранителя душ и телес наших, у Господа просим.
Л. Подай, Господи.
Д Прощения и оставления грехов и прегрешений наших, у Господа просим.
Л. Подай, Господи.
Д Добрых и полезных душам нашим и мира мирови, у Господа просим.
Л. Подай, Господи.
Д Прочее время живота нашего в мире и покаянии скончати, у Господа просим.
Л. Подай, Господи.
Д Христианския кончины живота нашего безболезненны, непостыдны, мирны, и добраго ответа на страшнем судищи Христове, просим.
Л. Подай, Господи.
Д Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.
Л. Тебе, Господи.
Св. И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати:
Л. Отче наш, иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Св. Яко Твое есть Царство, и сила, и слава, Отца и Сына и Святаго Духа, ныне и присно и во веки веков.
Л. Аминь.
Св. Мир всем.
Л. И духови твоему.
Д. Главы ваша Господеви приклоните.
Л. Тебе, Господи.
Священник молится:
Благодарим Тя, Царю невидимый, Иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небеси призри на подклоншия Тебе главы своя; не бо подклониша плоти и крови, но Тебе страшному Богу. Ты убо, Владыко, предлежащая всем нам во благое изравняй, по коегождо своей потребе: плавающим сплавай, путешествующим спутешествуй, недугующия исцели, Врачу душ и телес.
Возглас: Благодатию и щедротами и человеколюбием Единороднаго Сына Твоего, с Нимже благословен еси, со пресвятым и благим и животворящим Твоим Духом, ныне и присно и во веки веков.
Л. Аминь.
Священник молится:
Вонми, Господи Иисусе Христе Боже наш, от святаго жилища Твоего и от престола славы царствия Твоего, и прииди во еже освятити нас, Иже горе со Отцем седяй, и зде нам невидимо спребываяй: и сподоби державною Твоею рукою преподати нам пречистое Тело Твое и честную Кровь, и нами всем людем.
