Сборник - Библия (на цсл. гражданским шрифтом)
11 И рече Господь к моисею: доколе преогорчевают мя людие сии? и доколе не веруют мне во всех знамениих, яже сотворих в них?
12 поражу их смертию и погублю их: и сотворю тя и дом отца твоего в язык велик и мног паче нежели сей.
13 И рече моисей ко Господу: иуслышат египтяне, яко возвел еси крепостию твоею люди твоя сия от них:
14 но и вси живущии на земли сей слышаша, яко ты еси Господь в людех сих, иже очима ко очесем являешися, Господи, и облак твой ста над ними, и столпом облачным идеши ты пред ними в день, и столпом огненным в нощи:
15 и потребиши люди сия аки единаго человека: и рекут вси языцы, елицы слышаша имя твое, глаголюще:
16 занеже не возможе Господь людий своих ввести в землю, о нейже клятся им, погуби их в пустыни:
17 и ныне да вознесется рука твоя, Господи, якоже рекл еси, глаголя:
18 Господь долготерпелив и многомилостив и истинен, отемляй беззакония и неправды и грехи, и очищением не очистит повиннаго, отдая грехи отцев на чада, до третияго и четвертаго рода:
19 остави грех людем сим по велицей милости твоей, якоже милостив был еси им от египта даже до ныне.
20 И рече Господь к моисею: милостив им есмь по словеси твоему:
21 но живу аз, и присно живет имя мое, и наполнит слава Господня всю землю:
22 яко вси мужие видящии славу мою и знамения, яже сотворих во египте и в пустыни сей, и искусиша мя, се, десятое, и не послушаша гласа моего,
23 истинно не узрят земли, еюже кляхся отцем их: разве чадом их, яже суть со мною зде, иже не ведят добра и зла, всяк юноша не ведый, сим дам землю: вси же разгневавшии мя не узрят ю:
24 раб же мой халев, яко бысть дух ин в нем, и возследова мне, введу его в землю, в нюже ходил тамо, и семя его наследит ю:
25 амалик же и хананей живут во юдоли: утре возвратитеся и подвигнитеся вы в пустыню путем моря чермнаго.
26 И рече Господь к моисею и аарону, глаголя:
27 доколе сонм сей злый? яже они ропщут противу мне, роптание сынов израилевых, имже возропташа о вас, слышах:
28 рцы им: живу аз, глаголет Господь: истинно, якоже глаголасте во ушы мои, тако сотворю вам:
29 в пустыни сей падут телеса ваша, и все соглядание ваше, и сочтения ваша, от двадесяти лет и вышше, елицы ропташа на мя:
30 аще вы внидете в землю, на нюже прострох руку мою, вселити вас на ней, разве халев сын иефонниин и иисус сын навин:
31 и чада ваша, ихже ресте в разграблении быти, введу я в землю, и наследят землю, от неяже вы отвергостеся:
32 и телеса ваша падут в пустыни сей:
33 сынове же ваши пасоми будут в пустыни четыредесять лет, и носити имут блужение ваше, дондеже потребятся телеса ваша в пустыни:
34 по числу дний, в нихже соглядасте землю, четыредесять дний, за день лето целое, понесете грехи вашя четыредесять лет, и увесте ярость гнева моего:
35 аз Господь глаголах вам: истинно тако сотворю сонму сему злому, воставшему на мя: в пустыни сей потребятся, и тамо измрут.
36 И мужие, ихже посыла моисей соглядати землю, и пришедше возропташа на ню к сонму, еже бы изнести словеса зла о земли,
37 и изомроша мужи, глаголавшии о земли зло, язвою пред Господем:
38 и иисус сын навин и халев сын иефонниин живы остастася от мужей тех ходивших соглядати землю.
39 И глагола моисей словеса сия ко всем сыном израилевым: и восплакашася людие зело,
40 и воставше заутра, взыдоша на верх горы, глаголюще: се, мы взыдем на место, еже рече Господь, яко согрешихом.
41 И рече моисей: вскую вы преступаете слово Господне? не благопоспешно будет вам:
42 не восходите: несть бо Господь с вами: и падете пред лицем враг ваших:
43 зане амалик и хананей тамо пред вами, и падете мечем, понеже отвратистеся, не покаряющеся Господу, и не будет Господь с вами.
44 И понудившеся взыдоша на верх горы: кивот же завета Господня и моисей не двигнушася из среды полка.
45 И сниде амалик и хананей седяй в горе той, и сотроша их, и изсекоша их даже до ермана: и возвратишася в полк.
Глава 15
1 И рече Господь к моисею, глаголя:
2 глаголи сыном израилевым и речеши к ним: егда внидете в землю вселения вашего, юже аз даю вам,
3 и сотворите принос Господу во всесожжение или жертву, еже возвеличити мольбу, или благовольну, или в праздники вашя в воню благовония Господу, аще убо от волов, или от овец:
4 и да принесет приносяй дар свой Господу жертву, муки пшеничны десятую часть ефи (меры), вмешены в елей четвертыя части ина (меры):
5 и вина на возлияние четвертую часть ина сотворите во всесожжение или в жертву: агнцу единому да сотвориши толико, принос воню благовония Господу.
6 И овну, егда творите его во всесожжение или в жертву, да сотвориши жертву муки пшеничны две десятины вмешаны в елеи, третию часть ина (меры):
7 и вина на возлияние третию часть ина принесете в воню благовония Господу.
8 Аще же творите от волов во всесожжение или в жертву, еже возвеличити мольбу, или во спасителное Господу,
9 и принесет с телцем принос муки пшеничны три десятины вмешаны в елей, пол ина (меры):
10 и вина на возлияние пол ина (меры), принос в воню благовония Господу.
11 Тако да сотвориши телцу единому, или овну единому, или агнцу единому от овец или от коз:
12 по числу их, яже аще сотворите, тако сотворите единому по числу их.
13 Всяк туземец да сотворит тако сицевая принести приношения в воню благовония Господу:
14 аще же пришлец в вас прибудет в земли вашей, или иже аще будет в вас в родех ваших, и сотворит принос в воню благовония Господу, якоже творите вы, тако да сотворит.
15 Сонме Господнь, закон един да будет вам и пришелцем прилежащым в вас, закон вечный в роды вашя: якоже вы, (тако) и пришлец да будет пред Господем:
16 закон един да будет и оправдание едино да будет вам и пришелцу прилежащему в вас.
17 И рече Господь к моисею, глаголя:
18 глаголи сыном израилевым и речеши к ним: егда внидете в землю, в нюже аз ввожду вас тамо,
19 и будет егда ясте от хлебов земли (тоя), отложите участие во отделение Господу: начаток теста вашего,
20 хлеб отлучите участие оное: якоже участие от гумна,
21 тако отделите той хлеб, начаток теста вашего, и дадите Господу участие в роды вашя.
22 Егда же согрешите и не сотворите всех заповедий сих, ихже глагола Господь моисею,
23 якоже повеле Господь Бог к вам рукою моисеовою, от дне в оньже повеле Господь к вам, и потом в роды вашя,
24 и будет аще от очес сонма сотворится неволею, и да сотворит весь сонм телца единаго непорочна от волов во всесожжение, в воню благовония Господу, и жертву сего, и возлияние его по уставлению, и козла единаго от коз греха ради:
25 и да помолится жрец от всем сонме сынов израилевых, и оставится им, яко нехотение есть: и сии принесоша дар свой, принесение Господу греха ради своего пред Господем, нехотений ради своих,
26 и оставится всему сонму сынов израилевых и пришелцу прилежащему в вас, яко всем людем нехотенное.
27 Аще же душа едина не хотящи согрешит, да приведет козу едину единолетну греха ради:
28 и да помолится жрец о души нехотевшей и согрешшей нехотением пред Господем, и да помолится о ней, и оставится ей.
29 Населнику (земли) сынов израилевых и пришелцу прилежащему в них, закон един да будет им, иже аще сотворит не хотящь.
30 И душа яже сотворит рукою гордости от туземец или от пришелцев, Бога сия разгневает, и потребится душа та от людий своих:
31 яко слово Господне презре и заповеди его разсыпа, сотрением да сотрется душа та: и грех ея на ней.
32 И бяху сынове израилевы в пустыни, и обретоша мужа собирающа дрова в день субботный,
33 и приведоша его обретшии собирающа дрова в день субботный к моисею и аарону и ко всему сонму сынов израилевых,
34 и ввергоша его в темницу: не совещаша бо, что сотворят ему.
35 И рече Господь к моисею, глаголя: смертию да умрет человек сей, да побиете его камением весь сонм вне полка.
36 И изведоша его весь сонм вне полка, и побиша его камением весь сонм вне полка, якоже глагола Господь моисею.
37 И рече Господь к моисею, глаголя:
38 глаголи сыном израилевым и речеши им: и да сотворят себе рясны на воскрилиих риз своих в роды своя: и возложите на рясны воскрилий прядение синее,
39 и будет вам на ряснах: и узрите их, и воспомянете вся заповеди Господни и сотворите я, и не развратитеся вслед мыслей своих и вслед очес ваших, имиже вы соблудисте вслед их:
40 яко да помянете и сотворите вся заповеди моя, и будете святи Богу вашему:
41 аз Господь Бог ваш, изведый вас из земли египетския, быти вам Бог: аз Господь Бог ваш.
Глава 16
1 И глагола корей, сын иссаара сына каафа сына левиина, и дафан и авирон, сынове елиавли, и авнан сын фалефа сына рувимля:
2 и восташа на моисеа, и мужи сынов израилевых двести и пятьдесят началницы сонма, сигклитики совета и мужи именити.
