Авва Дорофей - Аскетика. Том I
Ответ. Имеяй сердце твое пред Богом чисто, и не вредит тя сие. А еже имети сердце твое чисто, еже не глаголати ничесоже на кого, аки творя тому воздаяние, но за самое доброе. Да не возмниши убо сие быти клевету. Всякое бо дело, бываемое ко исправлению, несть оклеветание. От сего бо ниедино благо бывает, зде же предлежит произыти благу. И сего ради несть се оклеветание.
846. Ответ великаго старца Варсануфия ко отцем общежития.
Еммануил сказуется «с нами Бог». Осяжим убо себе самех, аще истинно есть с нами Бог. Аще бо удалихомся от зол, и странни художнику тех диаволу быхом, то воистинну с нами Бог. И аще горка бысть нам сладость злых, и усладися желание благих дел, и еже всегда имети на небесех жительство, воистинну с нами Бог. Аще вся человеки видим едино, и вся дни равны, воистинну с нами Бог. Аще любим ненавидящих нас, и поносящих, и укоряющих, и презирающих, и тщету творящих, и угнетающих, аки любящих нас, и похваляющих, и приобретение творящих, и упокоевающих, воистинну с нами Бог. Знамение же достигшаго в меру сию есть, еже имети с собою всегда Бога: всегда бо есть с ним Бог. Не сущу же тако, ниже с собою имущу Бога, нужда яже суть противнаго имети. И прочее разумно есть имущим ум.
847. Ин старец вопрошен бысть о сих, и отвеща: внимай себе: ниже бо вождь, ниже царь избавится в день суда. Да не послабиши убо дело то, да имееши дерзновение обрести милость пред Богом. И да не убоишися. Не вы бо носите дело сие, но Бог и старец. Аще убо сотворите силу вашу, общницы будете мзды. Аще ли же ни: вы понесете осуждение: помолися о мне.
848. Напиши ему сия: радость нам не мала, и всем боящимся Бога бысть о вступлении вашем в веру Христову. Больши же сея будет, егда увидим духовныя плоды, в вас произницающия. Ибо воистинну радость нам есть, да на вас исполнится евангельское оно слово: «тако да просветится свет ваш пред человеки, яко да видят добрая ваша дела, и прославят Отца вашего, иже на небесех» (Мф. 5, 16). Якоже весть великолепие ваше, новонасажденная (древеса) многи и красны плоды приносят. Понеже убо новокрещени есте, покажите всем на созидание многия и красныя духовныя плоды ваша, во славу святыя и единосущныя Троицы, и в похвалу вашу пред христолюбивыми царьми, от нихже сподобистеся сего великаго просвещения дара. Кии же суть духовнии плоды, паче сего, еже подвизатися о вере Христовой и уставити христианство? Аще бо и наипаче всего Христом стоит, не хощет Бог искусити предложение человеков, в показание всяко, камо стремятся. Ибо разрушится ей невозможно есть. Обещание бо Божие есть, яко «на сем камени созижду Церковь Мою, и врата адова не одолеют (ей)» (Мф. 16, 18). Подобаше убо благому делу приити, и блажен, имже приходит. Восхищайте убо, о христолюбцы, таковое блаженство. Сие же ведати хощу вашему благородию. Яко аще бы был еллин, емуже вручена есть власть, и противник веры, и деял бы нечто, то нечтоже ино могли бы мы сотворити, разве затворити церкви, дондеже отверзены бы были от христолюбивых царей.
Вопрос 849. Понеже имать церковь устав, да не изводится позде позор, ниже в праздники еллинския, и хощет князь сия нарушити: како повелеваеши, да напишем ему?
Ответ. Напиши ему сице: слуга еси Божий, по апостолу, и повелен еси сохраняти заповеди Его, якоже и аз повелен есмь: подобает убо нам хранити права и преимущества Церкве во славу Божию, и похвалу вашу. Любя убо вас, аки нашего друга, напомянух вам. Несть бо праведно человеком христианом и подобным вам христолюбцем предпочести потеху человеческую на вред душ паче служения Богу.
Вопрос 850. Понеже муж некий велик и силен гражданин наш, в Константинополи пребываяй, зело подвизается во еже ввести сия позоры: что повелеваеши, напишу ли ему? И аще восхощет нам наветовати, помолися, да не возможет.
Ответ. Напиши ему тако: чадо, вся молитва наша есть, да умножит Бог веру христианскую, по страху Своему, и да вознесет рог Церкве Своея. Той есть надежда спасения нашего. И уразумей во время нужды, откуду имамы помощь, аще не от Церкве и молитв святых. И приклоняяйся к сим, обретает та во время потребно, позорища же, лавки суть диавола, и тщайся составити сия, падает от стада Христова, и бывает часть диаволя. Вемы же, яко вы чада есте Церкве Христовы, и всегда тщитеся угодная Ему творити. Учения бо не требуете, но напоминания; еже не общатися вам с текущими уставити позорища диавольская. Во время бо нужды ничтоже могут воспользовати, разве точию потопити текущия на ня. Аще же кто имать сердце к Богу, и угодная Ему хощет уставити, таковый со дерзновением призывает Его в день печали, и услышит его Той, подаваяй коемуждо по делом его. Весте, яко образ мира сего преходит, вера же Божия пребывает во век.
Сия напиши, и да не убоишися навета человек, о вере Божией подвизаяся, и имея того помощника. Противляяйся бо Тому, потопляется якоже фараон в Чермнем мори: несумненно же Тому веруяй, ста на твердом камени недвижимь.
Конец ответом святых отец Варсануфия и Иоанна.
Богу в Троице покланяемому слава. Аминь.
От жития святаго Нифонта, иже в Царьграде
Вопроси некий брат блаженнаго Нифонта, глаголя: рцы ми, отче, слово пользы, како спасуся?
Отвещав старец рече: аще хощеши, чадо, посреде человек жити, то сие должен еси сотворити: не порицати кого отнюд, не осуждати, не досаждати, не гневатися, не уничижати, ниже помышляти себе аки благо дело сотворша когда: и сохранися от еже глаголати: онсица добре живет, а онсица в невоздержании. Сие бо есть оно, еже: «не судите» (Мф. 7, 1). Но всех равным оком, единем предложением, единем помыслом и простым сердцем зри, и приемли всех, аки Христа. Да не приложиши уха твоего ко человеку клевещущу, ниже да усладишися с таковым, но молчанием многим держи уста твоя, косен сый на глаголание и скор на молитву. И да не укориши когда оклеветающаго, ниже другаго кого, беззаконие делающаго, но присно зри своя недостатки, и укоряй себе, и уничижай на всяк день.
Глаголет брат: сие, отче, совершенных есть подвижников.
Глаголет блаженный: чадо, юность аще имать смирение, довлеет ей. Ничесоже бо ищет от юнаго Бог, точию чистоты и смирения. Ты убо, чадо, буди кроток и смирен, сострадателен и милостив, и имей себе под всеми человеки, и будеши по истине с Богом водворяяся. Подвизайся же и о еже не мечтати умом, яко в меры онсицы святаго достигох, но глаголи себе выну тако: душе, веси ли, яко грехами превзыдохом и бесов, дело же благо николиже сотворихом Бога ради, и горе нам, о унизившаяся! Что сотворим в день судный? Буди же молитва твоя, чадо, во все время живота твоего, якоже грешника, глаголя на всяко время: «Господи Иисусе Христе, Сыне Божий, помилуй мя». И оно: «Боже, очисти мя грешнаго». Глаголи и сей глагол всегда: «от тайных моих очисти мя, и от чуждих пощади раба твоего» (Пс. 18, 13, 14). Виждь же и сие, да не довлеешися благими своими делами, ниже дерзай на ня, не веси бо, аще угодна суть пред Богом, или не угодна. Сего ради дерзай паче на Бога, и на силу Его: яко прах не полезен себе вменяя. И отсюду исправление.
Глаголет паки брат: отче, како может человек побеждати всяко искушение, находящо нань от супостата?
Отвеща старец: чадо, яково-нибудь искушение, аще найдет на тя, молчание есть победа ему, и смирение, и еже глаголати: благослови, отче. Вся же дела смиренномудраго разумна суть Богови и похвална пред святыми Ангелы Его: грозна же и страшна бесовом. Ты убо, чадо, буди смирен сердцем и сокрушен зело, яко да возжелает Дух Святый вселитися в тя и даст ти силу, еже отразите всякое житейское попечение.
Вопроси паки: еда ли, якоже ныне умножишася святии во всем мире, (тако) и на кончине века сего?
Глаголет ему блаженный: чадо, даже до скончания века не оскудеет пророк Господу Богу, такожде ниже сатане служитель. Обаче в последних днех, елицы воистину поработают Богови, скрыют себе благополучно от человек, и не будут в них знамения и чудеса совершати, яко же в нынешних днех, но делательным путем и растворенным со смирением, пойдут и большими знаменоносных отец обрящутся во Царствии Божии. Занеже тогда никтоже будет во очесех человеческих творити знамения, да от таковыя вины возгараеми человецы, зело со усердием на подвиги потекут. Будут бо украшающии священства престолы во всем мире неискусни отнюд, не ведущии художества добродетели. Такожде же и предстоятели монашествующих будут. Низложени бо будут от чревонеистовства пси, и от тщия славы, и будут соблазн человеком паче, а не образ. Сего ради паче вознерадена будет добродетель, сребролюбие бо тогда имать царствовати, и горе монахом, богатеющим златом: поношение бо будут таковии Господу Богу и не узрят лица Бога жива. Монах, или мирянин, даяй в лихву злато свое, аще не отступят от таковаго лихоимания, в глубоком тартаре потоплени будут: не произволяют бо плодопринести тая Богови благотворением нищим. Сего ради, чадо, якоже предрех, от невежествия держими множайшии, в пропасть падут, в широте заблуждающе широкаго и пространнаго пути.
