Сборник - Акафистник
Радуйся, бесчисленных щедрот подательнице:
Радуйся, слово премудрости дарующая.
Радуйся, твердая крепосте немощных:
Радуйся, совершенный разуме младенцев.
Радуйся, дарование исцелений требующим:
Радуйся, ветхаго и новаго завета печате.
Радуйся, девства сокровище, в церкви явленное:
Радуйся, деннице от Отца прежде Денницы возсиявшая.
Радуйся, праведных всегдашнее наслаждение:
Радуйся, падших известное возстание.
Радуйся, Радосте наша, покрый нас от всякаго зла, честным Твоим омофором.
Кондак 4Бурею многих бед одержимым нам, помогавши Богородице, стоиши бо пред лицем олтаря Господня, воздвигши руце Твои и молишися: яко да на нашу молитву призрит Господь, Царь славы, и послушает прошения призывающих имя Твое святое, к Сыну же Твоему зовущих: Аллилуиа.
Слыша Господь Бог Иисуса Навина молящася, и повелевающа солнцу стати, дондеже отмстит врагом, слышит и Твоя ныне Иисус Господь моления, избранная палато Духа Святаго: видяй Тя красну, яко луну, пред собою стоящу: темже и мы грешнии на Твоя надеющеся моления, Тебе яко Божией Матери глаголати дерзаем:
Радуйся, от солнца мысленнаго озаренная:
Радуйся, светом немерцающим просвещенная.
Радуйся, сиянием души землю просветившая:
Радуйся, чистотою тела Твоего небо возвеселившая.
Радуйся, всем сердцем Бога возлюбившая:
Радуйся, сердце любовию распаленное Сыну показующая.
Радуйся, сердце Твое о нас Христу в жертву принесшая:
Радуйся, все Твое помышление к Богу обратившая.
Радуйся, вся житейская ни во что же вменившая:
Радуйся, Едина Богу избранная.
Радуйся, всею крепостию Богу угождающая:
Радуйся, паче всех, Едина Богу возлюбленная.
Радуйся, Радосте наша, покрый нас от всякаго зла, честным Твоим омофором.
Кондак 5Боговидец Моисей в ополчении иногда на Амалика, егда руце воздвизаше Израиль одолеваше, егдаже низпущаше, тогда Амалик побеждаше: поддержащими же его укреплен, победи врага. Ты же Богомати воздевши руце Твои на умоление, всегда побеждавши враги христианския: одолевавши бо всем супостатом. И нам щит еси непобедим, вопиющим: Аллилуиа.
Икос 5Видевше Тя ученицы Христовы, от земли на небо восходящу, жалостными слезами лица обливаху. Ныне же узревше Тя на воздусе в церкви Влахернстей, молебне руце простирающую, радостно со Ангелы, святители и пророки вси прославляют: мы же крепчайшима, паче Моисеевых рук, дланьма Твоима укрепляеми, умильно вопием:
Радуйся, Еяже руце поддержит едина любовь и милосердие:
Радуйся, руце на враги, аки непобедимое оружие, вознесшая.
Радуйся, крепость вражию победившая:
Радуйся, Едина в руце наше защищение приемшая.
Радуйся, руце Твои в поручение о нас Богу приносящая:
Радуйся, Еяже десница прославися в крепости.
Радуйся, всю крепость нашу Христа, рукама носящая:
Радуйся, Еяже руце на побеждение супостат уготоване.
Радуйся, рукама Твоима приношение наше исполняющая:
Радуйся, света неприкосновеннаго приятелище.Радуйся, огнь божественный неопально держащая:
Радуйся, христиан к благодеянию тем воспламеняющая.
Радуйся, Радосте наша, покрый нас от всякаго зла честным Твоим омофором.
Проповедник скорый Твоея благодати, явися Роман сладкопевец, егда во сне от Тебе, в снедь прия свиток книжный: тем бо умудрен, нача разумно пети Тебе, святым же писати похвальная, и от сего разумев Тя истинную быти Матерь, премудрость Божию, взываше: Аллилуиа.
Икос 6Возсияла еси от истиннаго Солнца Правды заря, Дево Отроковице, просвещающая всех, и всех в познание приводящая, Ты бо Пречистая Дево, премудростию Божиею вразумлявши верных угодников Твоих, зовущих:
Радуйся, премудрости Соломоновой высшая:
Радуйся, тайная и неудобь предвиденная знающая.
Радуйся, избытия словес и решения гаданий сказующая:
Радуйся, зерцало непорочное Божия деяния.
Радуйся, богатство всего мира безценное:
Радуйся, древняя и будущая прорицающая.
Радуйся, мудрость века сего посрамившая:
Радуйся, Божию силу и Божию премудрость Христа породившая.
Радуйся, отверзающая уста немым:
Радуйся, достоинства всякаго подательнице.
Радуйся, благодатнаго учения наставнице:
Радуйся, всякий чин довольно благодеянием исполняющая.
Радуйся, Радосте наша, покрый нас от всякаго зла, честным Твоим омофором.
Кондак 7Хотя долготерпеливый Всевидец Господь явити Своего человеколюбия неизследимую щедрот бездну, избра Тебе Едину в Матерь Себе, и сотвори Тя людем непреодоленное защищение. Да аще кто от них и праведным судом Божиим осуждения достоин явится: Твоим обаче державным покровом сохраняется, Сыну же Твоему и Богу нашему, зовет: Аллилуиа.
Икос 7Дивная показал еси дела Твоя в Пречистей Матери Твоей, Господи, дивный омофор светящийся паче илектра, имже покрываше люди, сущия в церкви Влахернстей: вси убо узревше милосердное, паче надеяния, Ея заступление, ужасом одержими бывше, сия глаголаху:
Радуйся, омофор аки об лак распростершая:
Радуйся, превечнаго Архиереа знамение держащая.
Радуйся, омофором люди просвещающая:
Радуйся, новое знамение Тебе в церкви являющася.
Радуйся, столпе облачный, путь Христа показующий:
Радуйся, столпе огненный, мрак греха отгонящий.
Радуйся, крове, обнаженнаго мя добрых дел покрывающий:
Радуйся, церковь осветившая Твоим явлением.
Радуйся, растерзающая вретище скорби нашея:
Радуйся, одевающая нас вечною радостию.
Радуйся, Радосте наша, покрый нас от всякаго зла, честным Твоим омофором.
Кондак 8Странно Тя от небес во Влахернстей церкви явльшуюся, Ангели воспета, Апостоли прославиша, лик святителей и преподобных и жен святых сословие восхвалиша, Предтеча с Богословом поклонишася. Людие же, сущии в церкви с веселием вопияху: Аллилуиа.
Икос 8Всеми вышними и нижними владычествуя Господь, узрев Тя в церкви Матерь Свою стоящу: и разумев со умилением к Нему молящуюся рече: проси Мати Моя, ибо не отвращу ся от Тебе. Но исполню вся прошения Твоя, и благодарственная сице Тебе всех пети научу:
Радуйся, престоле царский премудраго Соломона:
Радуйся, руно прообразованное от славнаго Гедеона.
Радуйся, Юдифь непреборимая, стершая главу лютаго Олоферна:
Радуйся, всех под кров Твой прибегающих покрывающая.
Радуйся, избавляющая от тартара' преисподняго:
Радуйся, примирение наше с Богом.
Радуйся, Бога с человеки соединившая: Радуйся, далечайшее спасение от грешник близ устроившая.
Радуйся, смиренное наше естество поднесшая: Радуйся, жестокость сердца нашего умилившая. Радуйся, отчаянных к Богу возводящая: Радуйся, сосуды смертныя, на нас уготованнии, сокрушившая.
Радуйся, Радосте наша, цокрый нас от всякаго зла, честным Твоим омофором.
Кондак 9Все естество Ангельское похвальная приносит Тебе, истинней Божией Матери, и Заступнице всех, припадающих к Тебе: ведуще яко твердым и крепким покровом Твоим праведных возвеселявши, грешных заступавши и от бед избавлявши, и молишися о всех верных, зовущих: Аллилуиа.
Икос 9Ветия многовещанныя, яко рыбы безгласныя, недоумевают восхвалити великаго покрова Твоего праздник: ибо вся о Тебе глаголанная от нас грешных, и от скверных устен наших приносимая Тебе похвала, несть довольна к похвалению Твоея благости: мы обаче Твоя неисчетная благодеяния видяще, душею же и сердцем радующеся, глаголем:
Радуйся, хлебом жизни нас питающая: Радуйся, от губительства смертнаго нас соблюдающая.
Радуйся, от труса начальником тишины нас сохраняющая:
Радуйся, от потопа греховнаго рукою Твоею крепкою нас возводящая.
Радуйся, от огня росою молитв Твоих нас восхищающая:
Радуйся, от глада душевнаго же и телеснаго сильным Твоим предстательством всех верных снабдевающая.
Радуйся, от меча смертнаго силою Твоею нас избавляющая:
Радуйся, от нашествия иноплеменник одождением камык нас спасающая.
Радуйся, от междоусобныя брани истинным миром ограждающая:
Радуйся, от смертоносныя раны словом Твоим нас исцеляющая.
Радуйся, от належащаго праведнаго прещения Божия Твоим молением нас свобождающая:
Радуйся, от всяких нас бед Твоим честным покровом изымающая.
Радуйся, Радосте наша, покрый нас от всякаго зла честным Твоим омофором.
Кондак 10Спасти хотя род человеческий от прелести вражия, человеколюбец Господь Тебе, Матерь Свою, дарова земным в помощь, покров и защищение, яко да будеши печальным утешение, скорбящим радование, обидимым Заступница, и да всех из глубины греховныя воздвигнеши, поющих: Аллилуиа.
