Авва Дорофей - Аскетика. Том I
Глаголет бо Божественное Писание: «Сего ради оставит человек отца своего и матерь, и прилепится к жене своей, и будета два в плоть едину» (Быт. 2, 24). Ведый убо апостол, яко воля есть Божия, еже не точию демонская, но и естественная оставити, рече: «яко плоть не ползует ничтоже» (Ин. 6, 63). Прилепляяйся убо к жене плоть есть: прилепляяйся же Господеви дух есть. Хотящим убо духовными быти, отметатися подобает плоти. Еже бо не пользует, то и вредно есть. Вредное же отметно есть. Хотящим же в мире благочестно жити, проповеда, яко «честна женитва» (Евр. 13, 4) и прочая. А иже от бесов помыслы: первее смущени суть и печали исполнени, и сокровенне и тонце в след себе влекут: Одеваютбося во одежды овчи, сиречь влагают помыслы аки правды, суть же внутрьуду волцы хищницы (Рим. 16, 18), рекше, видимыми благими, паче же непотребными, восхищают и прельщают сердца незлобивых. Понеже убо писано есть о змии, яко мудрейший есть, присно блюди его главу (Быт. 3, 1, 15), да не когда той обрящет у тебе язвину, и тою вселение: и прочее соделает опустошение. Аще убо и ты желаеши духовен быти, отложи плотская: ихже бо отрицается кто, сия и отметает. И услыши Самого Господа глаголюща: «аще кто хощет по Мне ити, да отвержется себе, и возмет крест свой и по Мне грядет» (Мф. 16, 24). Како же себе отрицается человек? Точию оставил хотения своя естественная и Тому последовав. Сего бо ради собственне о естественных глаголет, а не о чрезъестественных. Аще бо чрезъестественная оставит кто, от яже суть его ничтоже оставил есть Бога ради. Ниже бо его суть. Оставивый же естественная своя, таковый выну со святым апостолом Петром вопиет: «Се мы оставихом вся, и в след Тебе идохом, что убо будет нам?» (Мф. 19, 27–29) и слышит блаженный оный глас, и о жизни вечныя обетованием изветствуется. Что бо остави Петр, не сый богат, и о чесом хваляшеся, аще не естественная своя хотения? Аще бо не умрет человек плоти, духом живя, востати не может. Якоже убо не пребывают с мертвецем естественная его хотения отнюд, тако ниже со умерщвленым плотию духовне. Аще убо умерл еси плоти, како живут в тебе естественная хотения? Аще ли же неси меры духовныя, но еще младенствуеши умом, смирися учителю, да накажет тя милостию: и кроме совета ничтоже твори, аще и мнится ти добро быти видимое. Свет бо иже от бесов, тма бывает послежде. Еже убо аще слышиши, или помышляеши, или видиши, аще и мало смутится сердце твое, бесовско есть сие. Приими убо написанная ти вкратце: веруя, яко аще потрудишися в сих предуспети, дарует ти, даруяй всем Бог еже быти, выну со святыми его купно служити, радоваться, и купно наследовати благая Его, о Христе Иисусе Господе нашем: Емуже слава, честь, и держава, ныне и присно и во веки веков. Аминь.
60. Старцу ни с кимже сретающуся, разве со своим учеником аввою, тойжде брат, писании срестися с ним моляше, глаголя: яко и авва Моисей, и прочии отцы сретахуся с требующими. Отвеща убо ему старец писменно и с проречением: егоже бытие самым искусом мы познахом. Рече бо: яко имать явитися ему, каким образом, и чесо ради? неверующих ради во Иудеи. По времени бо, томужде брату впадшу во искушение, не верующу и глаголющу: не быти отнюд в келлии старцу, но притворив глаголати авве присутствие его: призвав старец тогожде брата, и обретшихся на месте оном, умы всех ноги, и аз же грешный удостоихся умовения онаго. И тако воспрянув брат оный, и сей ответ воспомянув, исповеда нам свое неверие и проречение старцево. И вси прославихом Бога. Есть же ответ сущ тако:
Брате, никтоже весть яже другаго, точию дух человека живущий в нем (1 Кор. 2, 11). Кийждо весть, что имать в дому своем и что притяжа во влагалище, и потому раздает и на препитание инех. И повеление имамы Владыки, не здати столпа, аще не первое разчтем имения (Лк. 14, 28). Изчислил еси мне святых богатых бывших по духу, и возвеселил мя еси в разуме твоем: аще бы паче и в делех! Испытую же тех, и обретаю, яко по превосхождению добрых их деяний, толико есмь и аз во злых моих деяниях. И онии убо дерзающе творяху: аз же, и не творя, трепещу ведая содеянная мною, глаголющаго ради: «научая инаго, себе ли не учиши»? (Рим. 2, 21). Понуждаюся же послушати поносящаго ми и глаголюща: «лицемере, изми первее бервно из очесе твоего» (Мф. 7, 5) и прочая. Труждаюся же изъяти, и не могу. Не отчаяваюся же, но надеюся получити. Рцы ми, брате: аще кто речет некоему нищу, яко человецы нецыи много дадоша, даждь и ты ничтоже имый: еда может сие сотворити? Что же к сему? Яко мнози жаждуще, и обретающе удоволствие воды, не любопытствуют о источнице, или о дожде, или реце, откуду текут: и мнози наслаждаются светлости солнца, и не любопытствуют, долго ли есть, или кратко, или нечувственно, или чувственно. И о инех стихиях такожде. И о Бозе написаша отцы, вопрошени бывше, яко ищи Господа, и не испытуй, где живет. Что же реку к тебе, оставлшему взыскуемое от тебе тщание о твоих согрешениих и желающу мя видети, червя смердяща, землю и пепел? Обаче и аз, безумен сый, радуяся послах ти ответ, заблуждаяй и мняй быти нечто: и забвению предах писанное, яко «мняй себе быти что, ничтоже сый, лстит себе» (Гал. 6, 3). Ей, прелстихся в сем, и глаголах, не сый достоин. Ты обаче, яко добр делатель и послушлив, делай, и да не взыщеши сего от мене, желающа видети и целовати тебе и всех, от яже по Богу любве. И аз же, аще известит ми Бог, от себе припаду, и облобыжу пяты ваши всех, моления ради и молитвы, еже избавитися от неверующих во Иудеи (Рим. 15, 31). Да не в парении, брате, иждиваем дни своя, но да стяжем плач, исполненный слез, да блаженство улучим (Мф. 5, 4). И поучимся в нищих и кротких, да снаследницы будем онех. И поженем мир со всеми, да обрящемся с сынми Божиими и претерпим поношение и укоризну, да умножится мзда наша на небесех. И потщимся с делы благими явитися Ему, яко да видят человецы добрая наша дела и прославят Отца нашего Иже на небесех (Мф. 5, 16). Не яко исправив, написах ти сия, ибо должника себе во многих долгах вижу: но непрестанно припадаю, моляся Богови, еже даровати мне же и тебе оставление грехов, молитвами святых. Аминь.
Ответ 61, тогожде великаго старца к томужде, ублажавшу его за таковую добродетель, и рекшу речи от писания, и вопросившу: подобает ли оставити овощи? и верно и благообразно по отцех жити? и о молитве, еже просветитися разболевшимся его очесема.
Брате, на мне исполнися тобою Писание, глаголющее: «людие мои, блажащии вас: льстят вы» (Ис. 3, 12) и прочая. Таковое блаженство не оставляет нас видети студа дел наших. Вредит бо, якоже мню, и достигших в меру, и от яже в Бога веры отлучает. Глаголет бо: «како можете веровати в Мя, славу друг от друга приемлюще» (Ин. 5, 44)? Разумеваяй смирение апостолово, изберет паче буйство, да послежде будет мудр. Показуяй бо себе разумна, а не паче духовна, удивляюся, избежит ли осуждения за кичение уставленнаго? О смиренных же пишет, яко приемлют благодать. Аще кто исповедает сладость словес Божиих, не вкушает же тоя, таковый горьку тую показует. Не горько ли слово оно, яко «аще кто хощет по Мне ити, да отвержется себе, и возмет крест свой, и по Мне грядет» (Мф. 16, 24). Аще ли же сладко, то чесо ради, хотяще исполнити свою волю, отвергаем тое? Показуяй себе ведуща путь, ведущий во град, или аки презирая вопрошает, или искушает насмеваяся. Аще ли же весть путь, и не хощет ходити по нем, таковый яко ленивейший осуждается. Имеяше же и авва Арсений разум, но не являше. Смиренномудрствуя бо глаголаше: «хощу спастися, и не вем како». Аще убо покажет кто брату своему путь оный, и вознерадит ходити путем тем, повинен обрящется. Сей же есть путь: да проходимая и созади пометаемая нами не привлекут нас вспять: понеже обретаемся на месте, отнюдуже изыдохом, осуждения достойни, и всуе сотворше труд. Хотяй бо познати совершенно путь, аще не шествует с ведущим совершенно путь той, то никогдаже достигнет во град. Поверзи волю свою созади себе, и смиряйся во всем животе твоем, и спасешися. О овощи же, да не взыщеши от себе: аще ли же дадут ти, приими и яждь, воздыхая за осуждение сладости. Аще же приводиши святых, то подражай и совершенству отвержения, и срастворенней в делех вере их. Без дел бо, рече, яко мертва есть. И понеже глаголеши, благообразно: то не обрящеши благолепнейша дела, бываемаго с покорением: послушание бо есть. И рече некто, яко сын послушлив в живот. О очесех же, силен есть Создавый тая просветити со внутренними очесы, имиже аще разумеваем по гласу Спасителеву, то не имамы нужды в сих, аки зрящих суету мира. Силен убо Бог сотворити, да обрящемся и мы со спасающимися, во славу всесвятаго имене Его. Аминь.
Ответ 62, тогожде великаго старца ктомужде, вопросившу с другими, кто даде диаволу началство и власть?
Аще уразумети хощете то, еже есть вам не нужно, сиречь, кто даде диаволу началство и власть, от сего уразумейте, и да не сотворите за неразумие ваше Бога виновна быти злых: от себе приимите пример. Аще кто от вас своим произволением уклоняется на злое, то властительски творит зло оно, и судим бывает от Бога, яко сотворивый злое своею властию. Кто же власть даде ему? Не Бог ли? Чесо убо ради его осуждает? Да не покажете за строптивость врага Бога волителя быти злу. Несть бо сие, да не будет. Но аще и рекоша нецыи от святых, обаче вы совершенно не разумеете, како рекоша. По сему бо речено бысть, яко Бог даде ему начальство и власть, от еже не удержати его, или возбранити от совершения зла. И уразумейте от сего: «аз ожесточих сердце фараона» (Исх. 7, 3; 10, 20). Аще убо сие есть, то како его осуждает? Но сие глаголет, яко не прежде наказа и. Паки от книги Иова сие возможно познати кому, содержит бо, яко диавол погубил его имения, и чада: и разсуди его глаголюща: «Господь даде, Господь отъят, якоже Господеви изволися, тако и бысть: буди имя Господне благословенно вовеки» (Иов. 1, 21; 2, 6). Почто убо не именует погубившаго, но Долготерпевшаго, и Могущего возбранити и удержати тое злое? И вонми, яко не за ино что рече ему: «се даю его в руце твои», точию, яко Бога порицаше виновна быти исповеданию праведника онаго, о бывших на нем благодеяниих. Не удержав убо Бог, именуется аки давый ему начальство и власть. Бог бо от начала, доброе начальство ему вверил есть; и дав не отнял есть: он же, приимь отверже, и вместо того облечеся в начальство злых. Невозбранивый убо Бог, именуется яко давый. Не пишет: «и не восхоте благословения, и удали е от него Бог», но: «и удалится от него» (Пс. 108, 17). Вы убо, да не имеете Бога виновна быти злым: понеже осудит вас сие: но он сам себе избра начальство злых, и не возбрани ему Бог. Ибо глаголет: «и возлюби клятву, и приидет ему», а не глаголет, яко Бог даде ту ему. Вы убо стойте непоколебими о Господе, верующе, яко начальник жизни нашея и всех благих есть Той. И простите мя влекома от вопрошений детских, и оставлша предлежащее совершенство. Чада, да благословит, и да умножит плоды ваша Господь Иисус Христос, о имени Отца, со Святым Духом.
