Геннадий Новгородский - Послания
«Послание Геннадия Нифонту Суздальскому» до сих пор полностью не издавалось. С цензурными пропусками (без описания «кощунств») «Послание» это напечатано И. Хрущевым в «Источниках» его книги «Исследования о сочинениях Иосифа Санина» (стр. XXII—XXIII). «Послание» сохранилось в одном известном нам списке: 1) ГПБ, Q.XVII.50 (из собрания Ф. Толстого, отд. II, № 341); 4°; вт. пол. XVI в. (скрепа Евфимия Туркова, бывшего игуменом Волоколамского монастыря в 1575— 1587 гг.) Л. 296 — «Послание Геннадия Нифонту». Подробное описание — в «Обстоятельном описании славяно-российских рукописей Ф. А. Толстого» К. Калайдовича и П. Строева (М., 1825, стр. 472) и у И. Хрущова (ук. соч., стр. XX—XXIII).
Генадий архиепископ Великого Новаграда и Пскова[1] святейшему и боголюбивому и о святом дусе брату и сослужебнику Нифонту епископу Суздалскому достойную[2] и духовную любов сиим нашим писанием, въспосылаем боголюбию твоему, яко да будеши в здравии всесвященне и духовне и телесне
Что есми послал государю великому князю да и митрополиту грамоты да и подлиник о новгородцких еретицех, а Прохору епископу Сарскому грамоту есми о той же ереси послал же, а тебя тогды на Москве не было. И о сем твоему боголюбию въспоминаю, чтобы еси посмотрел в владычню в Прохорову грамоту в первую, занеже тамо о их ересех пространно изъявленно. Да усердно о том потщание имея, споборствуя по Христе бозе и пречистыя его богоматери, яко же должно есть твоему святительству въспоминая государю великому князу да и господину отцу нашему Геронтею митрополиту всея Руси, чтобы тому делу потщался исправление учинити, занеже ныне как продлилось то дело — обыск ему не крепок чинитца. Ино познают: еретикам ослаба пришла, уже ныне наругаютца христьянству — вяжут кресты на вороны и на вороны. Многие ведели: ворон деи летает, а кресть на нем вязан деревян, а ворона деи летает, а на ней крест медян. Ино таково наругание: ворон и ворона садятца на стерве и на калу, а крестом по тому волочат! А зде се обретох икону у Спаса на Ильине улици — преображение з деянием, ино в празницех обрезание написано — стоит Василией Кисарийский, да у спаса руку да ногу отрезал, а на подписи написано: обрезание господа нашего Иисуса Христа. Да с Ояти привели ко мне попа да диака, и они крестиянину дали крест телник древо плакун, да на кресте том вырезан сором женской да и мужской, и христианин де и с тех мест сохнути, да немного болел да умерл. А диак сказываетъца племенник Гриди Клочу еретику, что в подлинник не писан. И ныне таково есть бесчинство чинитца над церковью божиею и над кресты и над иконам и над христианьством. А того толке не управит государь[3] князь великий, а того накрепко не обыщеть, ино будет последьняя лесть горше первыя. И ты бы о том митрополиту явил, чтобы митрополит печаловался государю великому князю, чтобы поочистил церков божию от тое ереси. А тому бы есте не верили, что ся они зовут христиане, то они покрывают свою ересь тем[4], занеже то яз известно отведал на них. И твое бы боголюбие усердно попечение имел[5] о церкви божий и о православном християньстве. А милость господа бога вседержителя и его пречистыя богоматере и нашего смирения молитва купно же и благословение да есть всегда с твоим святительством и боголюбием. Аминь. Противень послал Нифонту епископу Суздалскому, да Филофею епископу Перьмскому в одны речи о еретицех с Семеном в Зезевитом. Лета 96 (1488) генваря.
Примечания
[1] Ркп. Генадий... Пскова написано киноварью. [2] Ркп. доистоную. [3] Ркп. государь вписано на поле [4] Ркп. тем вписано на поле [5] Ркп. имех.
Грамоты великого князя Ивана III и митрополита Геронтия архиепископу Геннадию Новгородскому. 1488 г., февраль
Две одновременных и сходных между собой грамоты Ивана III и Геронтия Геннадию о наказании новгородских еретиков — наиболее ранние источники, отражающие официальную позицию феодального государства и церкви по отношению к ереси. Сопоставление этих грамот с современными им посланиями Геннадия свидетельствует о том, что Иван III признал далеко не все обвинения Геннадия и не пошел полностью на предложенные новгородским владыкой инквизиционные меры. Грамоты Ивана III и Геронтия Геннадию издавались дважды: в «Актах исторических» (т. I, 1841, № 285) и в «Памятниках древнерусского канонического права» А. С. Павлова (РИБ, т. VI, № 114) по единственно сохранившемуся списку из собрания Ф. Толстого. В настоящем издании нами использован тот же список: 1) ГПБ, Q.XVII.50 (из собрания Ф. Толстого, отд. II, № 341); 4°; вт. пол. XVI в. Лл. 167—170 — грамоты Ивана III и Геронтия; л. 296 — «Послание Геннадия Нифонту» (см. выше, стр. 312).
[1]От великого князя[1]
От великого князя Ивана Васильевичя всея Русии, в нашу отчину в Великий Новъгород, богомолцу нашему архиепископу Великого Новагорода и Пскова, владыце Генадию. Писал еси ко мне, да и к митрополиту, грамоту о ересех и о хуле на Христа сына божиа и на пречистую его богоматерь, и о поругании святых икон, что которые в Новегороде священники, и диаконы, и диаки, и простые люди, жидовскую веру величают, а нашу веру православную Христову хулят, да и список еси тех ересей прислал к нам на тех еретиков: и яз, с своим отцем с митрополитом и с епископы и со всем собором, по твоему списку, розсудили, что поп Григорей Семеновской, да поп Ересим Николской, да попов Григориев сын Самсонко диак, по правилом царьскым, дошли градские казни, потому что на них есть свидетельства в твоем списке; а на Гридю на Борисоглебского в твоем списке свидетельства нет, опрочи попа Наума. И яз попа Григорья, да попа Ересима, да Самсонка диака, велел здесе казнити градскою казнию, да казнив, послал есми их к тебе, с твоим князем с Кривоборским с Иваном: и ты бы у собя собрав собор да обличив их ересь, да и понаказал их; и толко не покаются и перед тобою о той ереси, и ты их пошли к моим наместником, к Якову да к Юрью Захариичем, и [2]они их[2] тамо велят казнити градскою же казнию. А Гридю диака к тебе же есми послал, и ты его там обыскивай. А на которых еси писал, в том же списке, о тех же ересех, на священников и на диаконов и на диаков, и на простых людей, которые в Новегороде живут: и ты тех обыскивай с моими наместникы. И которых обыщешь, по правилом святых апостол и святых отець будут достойны вашей казни церковные, ино то и сам ведаешь; а будут достойны, по правилом, градские казни, и ты тех пошли к моим наместником, и [2]они их[2]велят казнити градскою казнию по разсужению. А сстатки бы еси поповы Григорьевы, и поповы Ересимовы, и Самсонковы диаковы, послав своего человека, — а наместьникы мои пошлют с твоим человеком своего человека, — да велите переписати, да переписав, да список ко мне пришлите. А которых иных попов и диаконов и диаков, и простых людей, в том деле обыщете и дойдут градские казни, и наместникы мои велят их казнити, а сстатки их переписав по тому же, да те списки ко мне пришлите. А князь великий и митрополить прислал с Кривоборскым о еретицех в лето 96 [1488] февр. 13.
[1-1] Написано сверху киноварью [2-2] В ркп. ни их.
От митрополита всея Руси
Благословение Геронтиа, митрополита всея Русии, о святом дусе сыну и сослужебнику нашего смиренна Генадью, архиепископу Великого Новагорода и Пскова. Писал еси к нам свои грамоты, к господину и сыну моему к великому князю Ивану Васильевичю всея Русии, да и ко мне, о том, что прозябают ереси в Новегороде, хулы и поруганья от священников, и от дияконов, и от дияков, и от простых людей, да и списке еси на тех ересников прислал к нам, по чему еси обыскивал, как они хулили Христа сына божиа и пречистую его богоматерь и ругались святым иконам, а величают жидовскую веру, а нашу православную християнскую веру хулят: и мы то дело с господином и сыном своим, с великим князем, и со всем православным собором поразсудили: что в твоем списке писаны, поп Григорей Семеновской, да поп Ересим Никольской, да попов сын Григорьев Самсонко диак, и те, по святителским правилом и святых апостол и святых отець, достойни извержению и отлученью от святые церкви и проклятью подлежат, потому что на них в твоих спискех сведетельства есть о их ересех и хулах и о поруганьи; а по царскым правилом, от божественаго писаниа, достойны градскыа казни. И князь великий велел тех трех казнити, попа Григорья, и попа Ересима, да и Самсонка диака, градскою казнию, да казнив, послал их к тебе: и ты, сыну, у собя, в своем зборе, тех обличив да понакажи духовне, по правилом святых апостол и святых отець, как достойно по божественому писанию, чтобы они покаалися и в разум истинны пришли; и толко покаются, да будут достойни милости; а не покаются, и ты их пошли к наместником великого князя, и они их тамо велят казнити градскою казнию, по великого князя наказу, как писано в царскых правилех. А Гридя диак не дошел ешо, по правилом, градские казни, потому что на него один свидетель, поп Наум: и ты того тамо обыскивай, и что на него обыщешь, по правилом, казнь духовную или градскую, ино то сам ведаешь. А которых еси иных писал в своих спискех, священников и диаконов и диаков и простых людей, что те лихие дела делають, и ты бы того обыскивал с великым прилежанием и со многим извещением, как нам велено по божественому писанью безпрестанно пещися о духовных вещех. А князь великий приказал с тобою того дела обыскивати наместником Якову да Юрью Захариичем: и ты бы с ними того дела обыскивал вместе. И которые дойдут, по правилом, твоей святительские духовные казни, и ты их духовне казни; а которые дойдут градские казни, ино тех наместники великого князя казнят градскою казнью. Да обыскивал бы еси, сыну, то дело прилежно, чтобы христианьство в змущеньи не было, а церковь бы божиа безмятежна была. Да будет на тебе милость божиа и нашего смиренна благословение.
