Сборник - Библия (на цсл. гражданским шрифтом)
10 и ныне что речем, Боже наш, по сем? яко оставихом повеления твоя,
11 яже дал еси нам рукою раб твоих пророков, глаголя: земля, на нюже вы входите наследити ю, земля нечиста есть, по нечистоте людий языческих, в мерзостех их, имиже наполниша ю от уст даже до уст во сквернениих своих,
12 и ныне дщерей ваших не дадите сыном их и дщерей их не приемлите сыновом вашым, и не ищите мира их и блага их даже до века, яко да укрепитеся и снесте благая земли, и наследие дадите сыновом вашым даже до века:
13 и по всех, яже приидоша на нас в делех наших злых и гресе нашем велицем, понеже несть якоже Бог наш, иже избавил еси нас от беззаконий наших и дал еси нам спасение:
14 зане обратихомся разорити заповеди твоя и смеситися с людьми земными: не прогневайся на нас даже до скончания, еже не быти останку и спасаемому:
15 Господи Боже израилев, праведен еси ты, яко остахомся спасени, якоже день сей: се, мы пред тобою есмы вси в беззакониих наших, понеже не возможно стати пред тобою сего ради.
Глава 10
1 И егда моляшеся ездра и егда исповедашеся плачущь и моляся пред домом Божиим, собрашася к нему от израиля собрание велие зело, мужие и жены и отроцы яко плакахуся людие и вознесоша плачь.
2 И отвеща сехениа сын иеилев от сынов иламлих и рече ездре: мы преступихом пред Богом нашим и пояхом жены чуждия от людий земли, и ныне есть упование израилю о сем:
3 и ныне завещаем завет Богу нашему, да отвержем вся жены и рожденых от них, якоже хощет: востани и устраши их заповедьми Бога нашего, и по закону да будет:
4 востани, понеже на тебе есть глагол, и мы с тобою: укрепися и сотвори.
5 И воста ездра, и закля князи, священники и левиты и всего израиля, да сотворят по словеси сему. И кляшася.
6 И воста ездра от лица дому Божия и иде в сокровищный дом ионана сына елисувова и седе тамо: хлеба не яде и воды не пи, плакаше бо о преступлении пришедших от пленения.
7 И послано бысть слово во иудею и во Иерусалим всем сыновом преселения, да соберутся во Иерусалим:
8 всяк, иже аще не приидет в три дни, по совету князей и старейшин, возмется все имение его, и той отлучен будет от сонмища преселения.
9 И собрашася вси мужие иудины и вениамини во Иерусалим треми денми: сей есть месяц девятый: в двадесятый день месяца седоша вси людие пред домом Божиим трепещуще о словеси и от зимы.
10 И воста ездра священник и рече к ним: вы преступисте и взясте жены иноплеменнически, еже приложити ко греху израилеву:
11 и ныне дадите хвалу Господу Богу отец наших, и сотворите угодное пред ним, и отлучитеся от людий земли и от жен иноплеменнических.
12 И отвещаша все множество гласом великим и реша: по словеси твоему к нам сотворим:
13 обаче людие мнози суть, и время зимнее, и несть мощно стояти вне: и дело несть дне единаго или двух, зело бо много согрешихом во словеси сем:
14 да поставятся князие наши во всем множестве и во всех градех наших, иже пояша жены иноплеменничи, да приидут во времена повеленная, и с ними старейшины от всякаго града и судии, еже отвратити гнев ярости Бога нашего от нас словесе ради сего.
15 Обаче ионафан сын асаилев и иасса сын фекуев со мною о сем, и месоллам и савафай левитин помагаяй им.
16 И сотвориша тако сынове преселения: и разыдошася ездра священник и мужие князие отечеств в домы, и вси по именом, яко обратишася в день первый месяца десятаго, да взыщут глагола:
17 и совершиша во всех мужех, иже пояша жены иноплеменничи, даже до дне перваго месяца перваго.
18 И обретени суть от сынов священнических иже введоша жены иноплеменничи, от сынов иисуса сына иоседекова и братия его маасиа и елиезер, и иарим и гадалиа:
19 и даша руки своя изгонити жены своя, и согрешившии принесоша от овец о преступлении своем овна:
20 и от сынов еммировых ананий и завдиа:
21 и от сынов ирамлих маасиа и еллиа, и самиа и иеиил и озиа:
22 и от сынов фассуровых елиоинай, маасиа и исмаил, и нафанаель и иозавад и иласа:
23 и от левитов иозавад и фамуй и колиа, тойже и колит, и фефеиа, и иуда и елиезер:
24 и от певцев елисав: и от дверник солмин и телмин и одуа:
25 и от израиля, от сынов форосовых рамиа и азиа, и мелхиа и мелмин, и елиазар и асавиа и ванеа:
26 и от сынов иламовых матфаниа и захариа, и иаиил и авдий, и иеримоф и илиа:
27 и от сынов зафуевых елионай, елисув, мафанай и армоф, и завад и озиза:
28 и от сынов вавеиных ионан, ананиа и завуй и фали:
29 и от сынов вануевых мосоллам, маллух, адаиа, иасув и саал и римоф:
30 и от сынов фааф-моавлих еднеа и халил и ванаиа, маасиа, матфаниа, веселеил и вануй и манассии:
31 и от сынов ирамовых елиезер, иесиа, мелхиа, самаиа, семеон,
32 вениамин, малух, самариа:
33 и от сынов асимовых метфанаиа, мафафа, завад, елифалет, иерами манассий, семей:
34 и от сынов ванииных моодиа, амрам и уил,
35 ванаиа, вадаиа, хелиа,
36 уаниа, маримоф и елиасив,
37 матфаниа мафанай.
38 И сотвориша сынове вануиевы и сынове семеины,
39 и салемиа и нафан и адаиа,
40 махнада, авусесей,
41 аруесриил и самариа,
42 селлум, амариа, иосиф:
43 от сынов навуиных иеиил, мафафиа, завад, зевенай, иадай и иоиль и ванеа.
44 Вси тии пояша жены иноплеменнически, и родиша от них сыны.
Книга Неемии
Глава 1
1 Словеса неемии сына ахалиина. И бысть в месяце хаселев, двадесятаго лета, и аз бех в сусан-авире.
2 И прииде (ко мне) ананиа един от братий моих с мужи иудовы, и вопросих их о спасшихся, иже осташася от пленения, и о Иерусалиме.
3 И рекоша ми: оставшиися от пленения тамо во стране, во озлоблении велице и в поношении, и стены Иерусалимския разорены, и врата его сожжена огнем.
4 И бысть егда услышах словеса сия, седох и плаках и рыдах дни (многи), и бех постяся и моляся пред лицем Бога небеснаго,
5 и рекох: молю тя, Господи Боже небесный, крепкий, великий и страшный, храняй завет и милосердие любящым тя и хранящым заповеди твоя:
6 да будут уши твои внемлюще и очи твои отверсте, еже слышати молитву раба твоего, еюже аз молюся пред тобою днесь, день и нощь, о сынех израилевых рабех твоих: и исповедаюся о гресех сынов израилевых, имиже согрешихом пред тобою, и аз и дом отца моего согрешихом:
7 преступлением преступихом тебе и не сохранихом заповедий (твоих) и повелений и судеб, яже повелел еси моисею рабу твоему:
8 помяни убо слово, еже заповедал еси моисею рабу твоему глаголя: аще преступите вы, аз расточу вы в люди,
9 и аще обратитеся ко мне и сохраните заповеди моя и сотворите я, аще будет разсеяние ваше до конца небесе, оттуду соберу вы и введу вы в место, еже избрах вселитися имени моему тамо:
10 и тии раби твои и людие твои, ихже искупил еси силою твоей великою и рукою твоею крепкою:
11 молю, Господи, да будет ухо твое внемлющее на молитву раба твоего и на молитву рабов твоих хотящих боятися имене твоего: и благопоспеши убо рабу твоему днесь, и даждь его в щедроты пред мужем сим. И аз бых виночерпчий царев.
Глава 2
1 И бысть в месяце нисане лета двадесятаго артаксеркса царя, и вино бе предо мною: и взях вино и дах царю, и не бе ин пред ним.
2 И рече ми царь: чесо ради лице твое прискорбно есть, а неси болезнуяй? и несть сие, разве скорбь сердца. И убояхся зело
3 и рекох царю: царю, во веки живи: како не быти прискорбну лицу моему, понеже град, дом гробов отец моих опусте, и врата его сожжена суть огнем.
4 И рече ми царь: почто о сем ты вопрошаеши? И помолихся Господу Богу небесному
5 и рекох ко царю: аще царю видится благо, и аще угоден будет раб твой пред тобою, да послеши мене во иудею, во град гробов отец моих, и возсозижду его.
6 Рече же ми царь, и наложница седяше близ его: до коего времене будет путь твой, и когда возвратишися? И угодно бысть пред лицем царевым, и посла мя, и положих ему время.
7 И рекох царю: аще царю видится благо, даждь мне послание ко воеводам стран за рекою, да преведут мене, дондеже прииду во иудею,
8 и послание ко асафу стражу дубравы царевы, да даст ми древа покрыти врата столпа дому, и на стены градныхя, и на дом, в оньже вниду. И даде ми царь, якоже рука Божия благая (бе) со мною.
9 И приидох ко воеводам стран за рекою и дах им послание царево: посла же царь со мною началники силы и конницы.
10 И услыша санаваллат аронитин и товиа раб аммонитин, и зло има бысть, яко прииде человек взыскати блага сыновом израилевым.
11 И приидох во Иерусалим и бых ту три дни.
12 И востах нощию аз и мужие не мнози со мною, и ни комуже возвестих, что Бог дает в сердце мое сотворити со израилем, и скота не бе со мною, токмо скот, на немже аз седях.
13 И внидох во врата юдоли нощию, ко устию источника смоковничнаго и ко вратом гнойным, и бых размышляя о стене Иерусалимстей разореней и о вратах его пояденых огнем.
